जळगाव मिरर | ९ जुलै ०२५
आई पंढरपूर येथे वारीला गेलेली असतांना घरी एकटाच असलेल्या रामेश्वर उर्फ सचिन लक्ष्मण भोई (वय २५, रा. लक्ष्मीनगर) या तरुणाने गळफास घेत आत्महत्या केली. मंगळवारी सकाळी त्याची आई पंढरपूरवरुन घरी आली असता, तीला मुलाचा गळफास घेतलेल्या अवस्थेत मृतदेह दिसताच धक्का असल्याने आईने टाहो फोडला. तरुणाच्या आत्महत्येचे कारण अस्पष्ट असून या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, शहरातील कानळदा रोडवरील लक्ष्मी नगरात रामेश्वर उर्फ सचिन भोई हा तरुण आईसोबत वास्तव्यास होता. त्याची आई मंगलाबाई लक्ष्मण भोई या गेल्या काही दिवसांपासून पंढरपूरला गेल्या होत्या. त्यामुळे रामेश्वर उर्फ सचिन हा घरी एकटाच होता. मंगळवारी सकाळच्या सुमारास मंगलाबाई पंढरपूरहून आपल्या घरी परतल्या. घरी येताच समोर मुलाने गळफास घेतल्याचे पाहून त्यांना मोठा धक्का बसला. मुलाचा मृतदेह पाहताच त्यांनी हंबरडा फोडला. मंगलाबाईंचा आवाज ऐकताच शेजारच्यांनी त्यांच्याघराकडे धाव घेतली. शेजारच्यांनी तातडीने सचिनला जिल्हा वैद्यकीय महाविद्यालय व रुग्णालयात दाखल केले. मात्र, डॉक्टरांनी तपासणीअंती सचिनला मृत घोषित केले. या घटनेने मंगलाबाईंवर दुःखाचा डोंगर कोसळला आहे. काही वर्षापुर्वी रामेश्वर उर्फ सचिन याच्या वडीलांचे निधन झाल्यामुळे तो आईचा एकमेव आधार होता. तो शहरातील केळकर मार्केटमधील एका कपड्याच्या दुकानात कामाला होता. परंतू त्याने टोकाचा निर्णय घेतल्याने त्याच्या पित्या पाठोपाठ एकुलता एक मुलाच्या मृत्यूने त्याच्या आईवर दुःखाचा डोंगर कोसळला आहे.
रामेश्वर उर्फ सचिन भोई याने आत्महत्येसारखा टोकाचा निर्णय घेतल्यामुळे त्याच्या आत्महत्येचे कारण अद्याप स्पष्ट झालेले नाही. या प्रकरणी शहर पोलीस ठाण्यात अकस्मात मृत्यूची नोंद करण्यात आली आहे. पोलीस या घटनेचा अधिक तपास करत आहेत.
