जळगाव मिरर | १३ ऑगस्ट २०२५
कामानिमित्त मंबईला गेलेले महापालिकेतील कर्मचारी मारुती मधुकर कडूकार (वय ४३, रा. नबाबपूर, जि. यवतमाळ) हे परतत होते. दि. ११ ऑगस्ट रोजी मध्यरात्रीच्या सुमारास रेल्वेतून पडून त्यांचा दुर्देवी मृत्यू झाला. ही घटना जळगाव ते शिरसोली दरम्यान घडली. या प्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
सविस्तर वृत्त असे कि, यवतमाळ जिल्ह्यातील नबाबपूर येथे राहणारे मारुती कडूकार हे नगरपालिकेमध्ये नोकरीस होते. काही कामानिमित्त ते मुंबईला गेले होते, तेथून ते गावी परतत असताना जळगाव ते शिरसोली स्थानकादरम्यान खांबा क्रमांक १४३/२६ ते १४३/२४ दरम्यान ते रेल्वेतून खाली पडले. या विषयी तालुका पोलिसांना माहिती मिळाल्यानंतर पोहेकॉ गुलाब माळी व त्यांचे सहकारी घटनास्थळी पोहचले. त्यांनी कडूकार यांना शासकीय वैद्यकीय महाविद्यालय व रुग्णालयात दाखल केले असता डॉक्टरांनी मयत घोषित केले. सुरुवातीला या प्रकरणी अनोळखी म्हणून नोंद करण्यात आली होती.
मात्र मयताच्या पाकीटामध्ये आधार कार्ड व एक डायरी सापडली. डायरीतील मोबाईल क्रमांकावर पोलिसांनी संपर्क साधला असता, तो क्रमांक कडूकार यांचा मित्राचा निघाला. पोलिसांनी कडूकार यांच्या मित्राला घटनेची माहिती दिल्यानंतर त्यांनी तात्काळ त्यांच्या कुटुंबियांना घटनेची माहिती दिली. त्यानुसार कडूकार कुटुंबिय तात्काळ जळगावला आले. या प्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
