जळगाव मिरर | २७ जुलै २०२५
जळगाव रेल्वे स्थानकावरील नवीन जिन्याच्या रॅम्पवर शनिवारी २६ जुलै रोजी सकाळी साडेदहा वाजता एका अनोळखी वृद्ध व्यक्तीचा मृतदेह आढळला आहे. अंदाजे ६५ वर्षीय या व्यक्तीला तातडीने सामान्य रुग्णालयात दाखल करण्यात आले होते, परंतु उपचारादरम्यान त्यांचा मृत्यू झाल्याची माहिती रेल्वे पोलिसांनी दिली आहे. या अनोळखी मृतदेहाची ओळख पटवण्यासाठी रेल्वे पोलिसांनी नागरिकांना आवाहन केले आहे.
सविस्तर वृत्त असे कि, जळगाव येथील रेल्वे पोलीस चौकीचे पोलीस कर्मचारी सचिनकुमार जगदीश भावसार यांनी दिलेल्या माहितीनुसार, शनिवारी २६ जुलै रोजी सकाळी १०.३० वाजण्यापूर्वी जळगाव रेल्वे स्थानकावर ऑन ड्युटी स्टेशन मास्टर ठाकूर यांनी एका व्यक्तीची प्रकृती अस्वस्थ असल्याची खबर दिली. नवीन जिन्याच्या रॅम्पवर ही अनोळखी व्यक्ती आजारी अवस्थेत आढळून आली होती.
त्या व्यक्तीला तातडीने औषधोपचारासाठी जळगाव येथील सामान्य रुग्णालयात दाखल करण्यात आले. मात्र, दुपारी १२ वाजता डॉक्टरांनी त्यांना मृत घोषित केले. पोलिसांनी दिलेल्या वर्णनानुसार, मयत व्यक्तीचे वय अंदाजे ६५ वर्षे असून, त्यांनी पांढऱ्या रंगाचा मळकट शर्ट आणि राखाडी रंगाची पॅन्ट परिधान केली आहे. त्यांचे केस व दाढी पांढरी असून वाढलेली आहे. शरीर सडपातळ आणि रंग सावळा आहे. मयताची ओळख पटवावी असे आवाहन रेल्वे पोलिसांनी केले आहे. या संदर्भात जळगाव रेल्वे पोलीस ठाण्यात अकस्मात मृत्यूची नोंद करण्यात आली आहे.
