जळगाव मिरर | १२ ऑगस्ट २०२५
गेल्या काही महिन्यांपासून लाचलुचपत प्रतिबंधक विभागाने कारवाईचा धडाका लावला आहे. अनेक सरकारी अधिकारी आणि कर्मचारी त्यांच्या जाळ्यात अडकले आहेत. या कारवाईमुळे भ्रष्टाचारावर अंकुश लावण्याच्या दिशेने पावले पडत असली, तरी शिक्षणासारख्या संवेदनशील क्षेत्रातील अशा घटना चिंताजनक आहेत. अशीच एक कारवाई धुळे तालुक्यातील पंचायत समिती कार्यालयातील शिक्षण विस्तार अधिकारी रोहिणी नांद्रे यांना १० हजार रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहात अटक केली. या कारवाईमुळे शिक्षण क्षेत्रात खळबळ उडाली असून, एका महिला अधिकाऱ्याने अशा प्रकारे लाचेची मागणी केल्याने सर्वत्र आश्चर्य व्यक्त होत आहे.
धुळे तालुक्यातील चांदे येथील जिल्हा परिषदेच्या प्राथमिक शाळेची शिक्षण विस्तार अधिकारी रोहिणी नांद्रे यांनी नुकतीच पाहणी केली होती. यावेळी शाळेतील विद्यार्थ्यांची संख्या कमी असल्याचे त्यांच्या निदर्शनास आले. याबाबत वरिष्ठांना प्रतिकूल अहवाल सादर न करण्याच्या मोबदल्यात तसेच समग्र शिक्षा योजनेअंतर्गत शाळेला मिळालेल्या अनुदानाच्या बदल्यात रोहिणी नांद्रे यांनी स्वतःसाठी आणि शिक्षण अधिकारी कुवर यांच्यासाठी १० हजार रुपयांच्या लाचेची मागणी केली होती. याबाबत तक्रारदाराने लाचलुचपत प्रतिबंधक विभागाकडे तक्रार नोंदवली. त्यानुसार, एसीबीने सापळा रचून रोहिणी नांद्रे यांना लाच स्वीकारताना रंगेहात पकडले.
शिक्षणासारख्या पवित्र क्षेत्रात लाचेच्या या प्रकरणाने अनेकांच्या भुवया उंचावल्या आहेत. शासन विद्यार्थ्यांना दर्जेदार शिक्षण आणि सुविधा देण्यासाठी कोट्यवधी रुपयांचा निधी खर्च करत आहे. मात्र, शिक्षण क्षेत्राचे रक्षक म्हणून जबाबदारी घेणाऱ्या अधिकाऱ्यांकडूनच अशा प्रकारे शाळांवर आघात होत असल्याचे या प्रकरणातून स्पष्ट होत आहे. या घटनेमुळे जिल्हा परिषद आणि शिक्षण विभागाच्या कार्यपद्धतीवर प्रश्नचिन्ह उपस्थित झाले आहे.
