जळगाव मिरर | ६ जानेवारी २०२५
नाशिक जिल्हा शासकीय रुग्णालयातून पाच दिवसांच्या बाळाची चोरी झाल्याची धक्कादायक घटना समोर आली होती. मात्र, पोलिसांनी चोवीस तासांच्या आत या आरोपी महिलेचा शोध घेत तिला ताब्यात घेऊन बाळ सुखरूप आईच्या कुशीत परत केले. पण या घटनेची माहिती समोर आल्यानंतर, चकित करणारी माहिती उघडकीस आली आहे. आरोपी महिला, सपना मराठे, अत्यंत उच्चशिक्षित असून तिला मूल होण्यास अडचणी येत होत्या. त्यामुळे तिने बाळ चोरी करण्याचा धाडसी निर्णय घेतला.
खोटे गर्भवतीपणाचे नाटक
सपना मराठे ही धुळ्याची आहे आणि तिने एमबीए केले आहे तसेच लेखापाल पदाच्या परीक्षाही उत्तीर्ण केली आहे. मात्र, गेल्या नऊ महिन्यांपासून तिने आपल्या नातेवाईकांना गर्भवती असल्याचे खोटे सांगितले होते. अखेर, 5 दिवसांचे बाळ चोरी करण्याचा निर्णय घेत तिने नाशिक जिल्हा रुग्णालयात प्रवेश केला.
नाशिकच्या जिल्हा शासकीय रुग्णालयात सटाणा तालुक्यातील सुमन खान यांचा सिजर ऑपरेशन करून बाळ झाला होता. सुमन खान यांना रुग्णालयात अधिक उपचारांसाठी दाखल करण्यात आले होते. या दरम्यान, सपना मराठे हिने सुमन खान यांच्याशी ओळख करून त्यांचा विश्वास संपादन केला. तिने सुमन यांना सांगितले की रुग्णालयात तिचे नातेवाईक काम करत आहेत. सुमन यांना डिस्चार्ज मिळणार होता, त्यावेळी सपना त्या बाळाला घेऊन “तुम्ही मागे या, टाके दुखतील” असे सांगत बाळ घेऊन निघाली. पण त्यानंतर सुमन यांना त्या बाळाचा आणि त्या महिलेचा पत्ता लागला नाही. सुमन यांनी लगेच प्रशासनाकडे तक्रार केली आणि बाळ चोरीला गेले असल्याची माहिती दिली.
पोलिसांची तत्परता
नाशिक शहर पोलिसांनी घटनेचे गांभीर्य ओळखून तात्काळ पथके रवाना केली आणि बाळ अवघ्या 12 तासांत शोधून त्याला आईच्या कुशीत परत केले. पोलिसांनी एका खाजगी रुग्णालयात असलेल्या महिलेचा मागोवा घेतला आणि सपना मराठे हीच आरोपी असल्याची खात्री पटली.
आरोपीची कबुली
पोलिसांनी सपना मराठेची सखोल चौकशी केली असता, तिने बाळ चोरी केल्याची कबुली दिली. तिच्या कबुलीने पोलिसांनाही धक्का दिला. तिने मूल होण्याच्या अडचणींमुळे बाळ चोरी करण्याचा निर्णय घेतला, असे उघड झाले.
रुग्णालय प्रशासनावर टीका
या घटनेमुळे जिल्हा रुग्णालयाच्या सुरक्षेवर प्रश्नचिन्ह उपस्थित झाले आहेत. मागील महिन्यात देखील जिल्हा रुग्णालयात बाळ अदलाबदल झाल्याची घटना घडली होती. आता या घटनेमुळे रुग्णालय प्रशासनाच्या कार्यक्षमतेवर गंभीर सवाल उठले आहेत. पोलिसांच्या तत्परतेमुळे बाळ लवकरच सापडले, पण असल्या घटना नियमितपणे घडत असल्यास रुग्णालय प्रशासनावर योग्य नियंत्रण किती प्रभावी आहे, हे प्रश्न निर्माण झाले आहेत. याप्रकारे, जिल्हा रुग्णालयात ही घटना घडल्यानंतर प्रशासनावर मोठ्या प्रमाणात टीका करण्यात येत आहे.
