जळगाव मिरर | १२ एप्रिल २०२६
नाशिकमधील वादग्रस्त भोंदूबाबा अशोक एकनाथ खरात याच्याविरुद्ध सुरू असलेल्या विशेष तपास पथकाच्या (SIT) चौकशीत दिवसेंदिवस नवे धक्कादायक खुलासे समोर येत आहेत. या प्रकरणामुळे प्रशासन आणि तपास यंत्रणांमध्ये खळबळ उडाली आहे.
या प्रकरणात सामाजिक कार्यकर्त्या अंजली दमानिया यांनी केलेल्या दाव्यांमुळे नवे वळण मिळाले आहे. दमानिया यांच्या म्हणण्यानुसार, अशोक खरातच्या कॉल डिटेल्स (CDR) तपासताना काही संशयास्पद संपर्क क्रमांक आढळले असून, त्यात ‘शिजूका’ आणि ‘नॉडी’ यांसारखे कोडवर्ड वापरले गेल्याचे दिसून येते.
दमानिया यांनी सांगितले की, हे नंबर ट्रूकॉलरवर तपासले असता वेगवेगळी नावे समोर आली असून, या कोडवर्डच्या माध्यमातून खरात कोणत्या व्यक्तींशी संपर्कात होता, याचा सखोल तपास होण्याची गरज आहे. या संपर्कांमागे मोठे नेटवर्क असल्याचा संशयही त्यांनी व्यक्त केला आहे.
दरम्यान, या प्रकरणात आणखी एक महत्त्वाचा मुद्दा समोर आला असून, अशोक खरातची पत्नी कल्पना खरात गेल्या दहा दिवसांपासून फरार असल्याची माहिती आहे. शिर्डी पोलिस ठाण्यात दाखल गुन्ह्यानंतर ती घरातून निघून गेल्याचे समजते. पोलिसांकडून तिचा शोध सुरू असून, तिच्या माहेरच्या नातेवाईकांची चौकशी केली जात आहे.
तपास यंत्रणांच्या माहितीनुसार, अशोक खरातने पुणे, शिर्डी, नाशिकनंतर आता सोलापूर जिल्ह्यातही कोट्यवधी रुपयांची मालमत्ता खरेदी केल्याचे समोर आले आहे. उत्तर सोलापूर तालुक्यातील कळमण गावात तब्बल 11 एकरांहून अधिक जमीन खरेदी केल्याची नोंद असून, या व्यवहाराची किंमत सुमारे 2 कोटी 40 लाख रुपये असल्याचे दस्तऐवजांवरून स्पष्ट झाले आहे.
विशेष म्हणजे, शक्तीपीठ महामार्गाच्या परिसरातील ही जमीन बाजारभावापेक्षा अनेक पटींनी जास्त दराने खरेदी करण्यात आल्याची माहिती समोर आली आहे. त्यामुळे या व्यवहारामागे आर्थिक गैरव्यवहार किंवा बेनामी संपत्तीचा संशय अधिक गडद झाला आहे.
या संपूर्ण प्रकरणामुळे अशोक खरातभोवतीचा तपासाचा फास अधिक घट्ट होत असून, SIT कडून पुढील चौकशीत आणखी मोठे खुलासे होण्याची शक्यता वर्तवली जात आहे.
