जळगाव मिरर | १२ मे २०२३
पाचोरा शहरातील महाराणा प्रताप चौकात भरधाव पिकअप वाहनावरील चालकाचा ताबा सुटल्याने वाहनाने रस्त्यालगत असलेल्या दत्त मंदिरासमोर बसलेल्या चौघांना उडवल्याची घटना शुक्रवारी पहाटे साडेपाच वाजेच्या सुमारास घडली. या अपघातात चार जणांपैकी दोन जणांचे पायाचे जागेवरच तुकडे पडून दोन्ही पाय निकामी झाले आहेत. तर दोन जण किरकोळ जखमी झाले आहेत.
भडगावकडून बुलढाण्याकडे एम.एच. ४८ बीएम. ७९४३ या क्रमाकांचे पिकअप वाहन जात होते. यादरम्यान वाहन पाचोरा शहरातून जात असताना वाहनावरील चालकाचा ताबा सुटला आणि भरधाव वाहनाने रस्त्यालगत असलेल्या दत्त मंदिरासमोर बसलेल्या वसंत भाईदास पाटील, विनोद पाटील, अमोल वाघ आणि कुंदन परदेशी या चार जणांना जोरदार धडक दिली. या जखमींवर खासगी रुग्णालयात उपचार सुरु आहेत. यात वसंत भाईदास पाटील (वय ४२, रा. सुरत), विनोद पाटील (वय ५०, रा. पाचोरा), अमोल वाघ (वय २७, रा. पाचोरा) आणि कुंदन परदेशी (वय, १७, रा. पुनगाव ता. पाचोरा) अशी जखमींची नावे आहेत. यात विनोद पाटील आणि वसंत पाटील या दोघांच्या दोन्ही पायांचे जागेवर तुकडे पडले होते.
अमोल वाघ आणि कुंदन परदेशी या दोन जणांना किरकोळ दुखापत झाली. घटनेची माहिती मिळाल्यावर पाचोरा तालुका काँग्रेस कमिटीचे अध्यक्ष सचिन सोमवंशी यांनी घटनास्थळी धाव घेतली आणि त्यांच्या सहकाऱ्यांच्या मदतीने जखमींना तात्काळ पाचोरा येथील खासगी रुग्णालयात दाखल करण्यात आले आहे. माहिती मिळाल्यावर पोलिसांनीही घटनास्थळी धाव घेत पंचनामा केला, तसेच अपघातास कारणीभूत पिकअप वाहनावरील चालक आणि क्लिनर या दोघांना पोलिसांनी ताब्यात घेतलं आहे. या प्रकरणी पाचोरा पोलीस ठाण्यात गुन्हा दाखल करण्याचे काम सुरु आहे. दरम्यान, या अपघातात सुदैवाने जीवितहानी झाली नाही. अपघात झाला त्यावेळी पहाटेची वेळ असल्याने मॉर्निक वॉकला जाणाऱ्या नागरिकांसह रस्त्यावर ये-जा करणाऱ्या नागरिकांनी घटनास्थळी मोठी गर्दी केली होती.
