जळगाव मिरर | २३ जानेवारी २०२४
भरधाव कार महामार्गावरील रेल्वे उड्डाण पुलाच्या कठड्याला धडकून झालेल्या अपघातात भुसावळ शहरातील महेश नगरातील रहिवासी तथा औषध विक्रेता राजेश भंगाळे यांचा मृत्यू झाला. हा अपघात सुभाष गैरेजजवळ शनिवारी रात्री १०.४५ वाजेच्या सुमारास घडला.
मिळालेल्या माहितीनुसार, महेश नगरातील रहिवासी रहिवासी तथा मेडिकल व्यावसायिक राजेश सुरेश भंगाळे (वय ४२) हे रात्री जळगावकडून भुसावळात येत होते. सुभाष गॅरेजजवळ भंगाळे यांची इर्टीका कार (एमएच ०५, सीव्ही ९८५२) ही पुलाच्या कठड्यावर धडकली. या अपघातात राजेश भंगाळे हे गंभीर जखमी झाले. त्यानंतर त्यांना डॉ. उल्हास पाटील वैद्यकीय महाविद्यालय नेले असता वैद्यकीय अधिकाऱ्यांनी त्यांना मृत घोषीत केले.
अपघाताचे वृत्त कळताच मृत राजेश भंगाळे यांच्या मित्रांसह परिवारातील सदस्यांनी घटनास्थळी धाव घेतली. भुसावळ ग्रामीण रुग्णालयात राजेश भंगाळे यांच्या मृतदेहाचे शवविच्छेदन करण्यात आले. याप्रकरणी शहर पोलिस ठाण्यात प्रसन्न धनराज पाटील यांनी दिलेल्या माहितीवरून अपघाताची नोंद करण्यात आली आहे. मृत राजेश भंगाळे यांच्या पश्चात आई-वडील, बहिण असा परिवार आहे.
