जळगाव मिरर | ११ मे २०२३
पारोळा येथील राष्ट्रीय महामार्ग क्रमांक सहा पारोळा शहराबाहेरील बायपासवर इंडिका व्हिस्टाला अज्ञात वाहनाने जोरदार धडक दिल्याने झालेल्या अपघातात एक महिला ठार तर तीन जखमी झाल्याची घटना दिनांक ९ रोजीच्या दुपारच्या सुमारास घडली.
मिळालेल्या माहितीनुसार, धुळे कडून एम एच १९ बी यू १७१७ हि इंडिका व्हिस्टा गाडी ही जळगाव कडे जात असताना पारोळा बायपास वर तिला एका अज्ञात वाहनाने जोरदार धडक दिली.त्यात बबलू अनुसे (३५) दुर्गाबाई अनुसे (६४) गोपीबाई कोकरे (६०) हे जखमी झाले तर पुष्पाबाई रमेश काले (४५) यांचा जागीच मृत्यू झाला.जखमींना रुग्णवाहिकेने पारोळा कुटीर रुग्णालयात प्रथमोपचार करण्यात आले.
येथील बायपास वर तिन दिवसात किरकोळ पाच तर मोठें दोन असे अपघात झाले आहेत. यामुळें नागरिकांमध्ये चिंतेचे वातावरण पसरले असुन बायपास हा अपघाताचा पॉईंट ठरतो की काय? असा प्रश्न नागरिकांना पडला आहे. अपघाताची माहिती मिळताच रुग्णवाहिका चालक आशुतोष शेलार, ऋषिकेश सूर्यवंशी, रोशन पाटील, तुषार शेलार, राहुल भावसार यांनी घटनास्थळी धाव घेऊन जखमीना तात्काळ कुटीर रुग्णालयात दाखल इथे प्रथमोपचार करून पुढील उपचारासाठी जखमिंना धुळे येथे हलविण्यात आले आहे.
