जळगाव मिरर | १० ऑक्टोबर २०२३
राज्यातील ठाकरे व शिंदे गटात गेल्या काही दिवसापासून ऐतिहासिक दसरा मेळाव्यासाठी शिवाजी पार्क आम्हाला मिळावे अशी दोन्ही गटाने अर्ज केले होते. अखेर याचा निर्णय झाला असून या वादावर पडदा टाकत शिंदे सरकारचे मंत्री दीपक केसरकर यांची शिंदे गटाचा दसरा मेळावा हा दक्षिण मुंबईतील क्रॉस आणि ओव्हल मैदानावर होणार असल्याचे स्पष्ट केले आहे. वास्तविक शिवाजी पार्कसाठी शिवसेना (शिंदे गट) आणि ठाकरे गट दोघेही आग्रही होते. मात्र, आता या वादावर आता पडदा पडला असल्याची चर्चा आहे. शिवाजी पार्क मैदानाच्या या लढाईतून शिंदे गटाने माघार घेतली असल्याची चर्चा सध्या सुरू आहे.
शिंदे गटाचा दसरा मेळावा दक्षिण मुंबईतील क्रॉस आणि ओव्हल मैदानावर होणार असल्याची माहिती शिंदे सरकारमधील मंत्री आणि एकनाथ शिंदे यांच्या शिवसेनेचे प्रवक्ते दीपक केसरकर यांनी दिली आहे. त्यामुळे शिवसेनेच्या शिंदे गटाच्या भूमिकेमुळे दसरा मेळाव्यासाठी शिवाजी पार्क नेमके कोणाला मिळणार? हा वाद आता संपल्यात जमा आहे.
दसरा मेळाव्यासाठी आपल्याला शिवाजी पार्क मैदान मिळावे म्हणून उद्धव ठाकरे आणि एकनाथ शिंदे गटाने मुंबई महानगरपालिकेकडे अर्ज दाखल केला होता. शिवाजी पार्क मैदान आपल्यालाच मिळणार, असा दावाही दोन्ही गटाच्या नेत्यांकडून केला जात होता. त्यामुळे गेल्या वर्षीप्रमाणे या वर्षी देखील हा वाद चांगलाच रंगणार असल्याची चर्चा होती. शिवाजी पार्कवर यंदा कोणाचा दसरा मेळावा पार पडणार, असा प्रश्न निर्माण झाला होता. पण, आता हा प्रश्न सुटला आहे.
आम्हाला उद्धव ठाकरे यांच्या सोबत भांडायचे नाही. त्यांना फक्त सहानुभूतीचे राजकारण करायचे आहे, दसरा मेळाव्यासाठी आम्ही महापालिकेकडे केलेला अर्ज मागे घेतला असल्याची माहिती मंत्री दीपक केसरकर यांनी दिली आहे. यंदा दसरा मेळाव्याला शिवाजी पार्कवर उद्धव ठाकरे यांचा आवाज घुमणार असल्याचे स्पष्ट झाले आहे. उद्धव ठाकरे यांना आपण कधीच रोखलेले नाही. आमचा मेळावा हा क्रॉस किंवा ओव्हल मैदानावर होणार असल्याचे दीपक केसरकर यांनी यावेळी स्पष्ट केले.
