जळगाव मिरर | ३ ऑगस्ट २०२४
जळगाव जिल्ह्यातील महामार्गावर गेल्या तीन दिवसापासून नियमित अपघाताची मालिका सुरु असतांना आता बोदवड येथील विविध कार्यकारी सोसायटीचे कर्मचारी खासगी वाहनाने जळगावकडे येत होते. यावेळी समोरुन येणाऱ्या भरधाव डंपरने त्यांच्या वाहनाला जोरदार धडक दिली. या अपघातात वाहनातील कर्मचारी गंभीर जखमी झाले. ही घटना शुक्रवार दि. २ ऑगस्ट रोजी सकाळी अकरा वाजता जळगाव तालुक्यातील सुनसगाव येथे घडली. जखमींना तातडीन शासकीय वैद्यकीय महाविद्यालयात दाखल करण्यात आले. या घटनेबाबत नशिराबाद पोलीस ठाण्यात कोणतीही नोंद करण्यात आलेली नव्हती.
सविस्तर वृत्त असे कि, बोदवड येथील विविध कार्यकारी सोसायटीचे कर्मचारी खाजगी ओमनी वाहनाने शुक्रवार दि. २ ऑगस्ट रोजी सकाळी जळगाव येथे काही कामानिमित्त येत होते. त्यावेळेला सकाळी ११ वाजेच्या सुमारास कार ही जळगाव तालुक्यातील सूनसगाव जवळून जात असतांना भरधाव डंपरने त्यांना जबर धडक दिली. या भीषण अपघातामध्ये ओमनी कारमधील विविध कार्यकारी सोसायटीचे गट सचिव सुभाष प्रभाकर बावस्कर (वय ५२), कारकून रामदास देवराम मोरे (वय ५०), सोसायटीचे सेल्समन प्रकाश निना सोनार (वय ४०) यांचेसह चालक कैलास पुंडलिक सुशीर (वय ५०) हे गंभीर जखमी झाले आहेत तर नीना कैलास सुशीर (वय ३१) या तरुणाला किरकोळ मार लागला आहे.
हा अपघात घडल्यानंतर परिसरातील नागरीकांनी तात्काळ धाव घेवून जखमींना खासगी वाहनातून शासकीय वैद्यकीय महाविद्यालयात दाखल करण्यात आले. या घटनेची माहिती मिळाल्यानंतर राष्ट्रवादी कॉग्रेस शरद पवार गटाचे जिल्हाध्यक्ष अँड. रवींद्र पाटील यांनी त्यांच्या कार्यकर्त्यांसह रुग्णालयात धाव घेऊन जखमींची विचारपूस केली. दरम्यान, पोलिसांना माहिती मिळताच त्यांनी घटनास्थळी धाव घेतली होती. या घटनेबाबत पोलीस ठाण्यात कोणतीही नोंद करण्यात आलेली नव्हती.
