जळगाव मिरर | २२ फेब्रुवारी २०२४
राज्यातील अनेक शहरात गेल्या काही महिन्यापासून गुन्हेगारीच्या घटना डोकेवर काढत असतांना आता चंद्रपूर जिल्ह्यात देखील एक धक्कादायक घटना उघडकीस आली आहे. शेतजमिनीच्या वादातून एका नराधम मुलाने जन्मदात्या आई-वडिलांवरच कुऱ्हाडीने सपासप वार केल्याची घटना चंद्रपूर जिल्ह्यातील लोणी गावात बुधवारी २१ फेब्रुवारी रोजी भर दुपारच्या सुमारास घडली. या घटनेत आईचा जागीच मृत्यू झाला असून वडील गंभीर जखमी झाले आहेत. त्यांना उपचारासाठी रुग्णालयात दाखल करण्यात आलंय.
याप्रकरणी पोलिसांनी नराधम मुलावर गुन्हा दाखल करत त्याला अटक केली आहे. मनोज पांडूरंग सातपुते (वय ४५) असं आरोपी मुलाचं नाव आहे. तर कमला पांडुरंग सातपुते असे मृतक आईचे नाव आहे. या घटनेत पांडुरंग सातपुते गंभीर जखमी झाले असून त्यांच्यावर रुग्णालयात उपचार सुरू आहेत. मिळालेल्या माहितीनुसार, आरोपी मनोज याने शेतीच्या वादातून बुधवारी वयोवृद्ध आई-वडिलांसोबत वाद घालत खोलीत नेलं.
तिथे ठेवलेल्या कुऱ्हाडीने त्याने अत्यंत क्रूरतेने आईच्या डोक्यावर कुऱ्हाडीने वार करून आईला जागीच ठार केले. तर वडिलांच्या डोक्यावर दोन वार करून त्यांना गंभीर जखमी केले. यानंतर मनोज हा वहिनीला जीवे मारण्यासाठी तिच्या मागे धावला. मात्र, ती एका खोलीत लपून वहिनीचे कसाबसा आपला जीव वाचवला. घटनेनंतर आरोपीने तेथून पळ काढला. याप्रकरणी पोलिसांनी तपासाची चक्रे फिरवत मनोजला अटक केली. या घटनेमुळे परिसरात एकच खळबळ उडाली आहे.
