जळगाव मिरर | ५ डिसेंबर २०२३
देशभरातील अल्पवयीन मुलीसह विवाहितेवर अत्याचाराच्या नियमित घटना घडत असतांना एक संतापजनक बातमी व नात्याला काळिमा फासणारी घटना ओडिशा राज्यात घडली आहे. एका भावाने चक्क आपल्या चार मित्रांसह बहिणीवर सामुहिक अत्याचार करीत खून केल्याची घटना उघडकीस आली आहे.
मिळालेल्या माहितीनुसार, ओडिशातील कंधमाल जिल्ह्यात एका तरुणाने त्याच्या चार मित्रांसह आपल्या बहिणीवर सामूहिक अत्याचार केल्यानंतर कुऱ्हाडीने वार करून खून केला. हि घटना ३ नोव्हेंबरची असून पोलिसांनी सोमवारी सांगितले की, सर्व आरोपींना 2 डिसेंबर रोजी अटक करण्यात आली.
पोलिसांनी दिलेल्या माहितीनुसार, बहिणीचा मोठा भाऊ आणि मेहुणी यांचे अनैतिक संबंध होते. याची जाणीव महिलेला झाली. तिने भावाला संबंध संपवण्यास सांगितले. तसे न केल्यास कुटुंबीयांना याबाबत सांगेल असे सांगितले. यानंतर भावाने बहिणीची हत्या करण्याचा कट रचला. पोलिसांनी सांगितले की, घटनेच्या दिवशी ही महिला जंगलात पाने गोळा करण्यासाठी गेली होती. यावेळी मोठ्या भावाने आपल्या चार मित्रांना तेथे बोलावले. सर्वांनी जंगलात दारू प्यायली. यानंतर महिलेवर सामूहिक बलात्कार करण्यात आला. बलात्कारानंतर आरोपी भावाने बहिणीवर कुऱ्हाडीने वार केले, त्यामुळे तिचा मृत्यू झाला.
आरोपीने 6 नोव्हेंबर रोजी पोलिस ठाण्यात जाऊन बहिणीच्या हरवल्याची तक्रारही दाखल केली होती. दुसऱ्या दिवशी म्हणजे ७ नोव्हेंबरला पोलिसांनी महिलेचा मृतदेह जंगलातून विकृत अवस्थेत मिळवला. पोस्टमॉर्टममध्ये या महिलेवर अनेकांनी बलात्कार करून तिची हत्या केल्याचे समोर आले आहे.