जळगाव मिरर | ७ ऑक्टोबर २०२३
पालघर जिल्ह्यातील मोखाडा शहरात दि. ६ रोजी शुक्रवारी भरदिवसा एका आश्रमशाळेत शिकणाऱ्या १८ वर्षीय तरुणी अर्चना उदार हिची अज्ञाताने कोयत्याने गळा चिरून हत्या केल्याची घटना घडल्यानंतर मोठी खळबळ उडाली होती. हि घटना प्रेमप्रकरणातून झाल्याचा संशय आल्यानंतर पोलिसांकडून त्याचा शोध सुरू होता. मात्र घटनास्थळावरून संशयित आरोपी फरार होण्यात यशस्वी झाला होता. पण संशयिताने रात्रीच्या सुमारास एका परिसरात गळफास लावून घेतल्याचे समजते.
संशयित आरोपीने त्याच्या गावालगत असलेल्या तुळ्याचापाडा डॅमवर पाणी सोडण्यात येणाऱ्या लोखंडी गेटला रात्रीच्या सुमारास गळफास लावून आत्महत्या केल्याची घटना घडली असून याबाबतची माहिती मोखाडा पोलिसांनी दिली.
मोखाडा तालुक्यातील रयत शिक्षण संस्थेची महर्षी विठ्ठल रामजी शिंदे प्राथमिक व माध्यमिक गभालपाडा आश्रमशाळा आहे. ही मोखाडा शहराच्या ठिकाणी आहे. या आश्रमशाळेत वर्ग खोल्या कमी असल्याकारणाने या आश्रमशाळेपासून ५०० ते ६०० मीटर लांब असलेल्या महाविद्यालयात येथील ११ वी व १२ वीचे विद्यार्थी दररोज चालत जातात. मात्र अशावेळी घोळक्यानी किंवा शिक्षक यांच्यासोबत असतात. मात्र शुक्रवारी सकाळी मुली वर्ग संपवून जेवण्यासाठी पुन्हा महाविद्यालयाकडून आश्रमशाळेकडे येत असताना, निर्मनुष्य असलेल्या कब्रस्तानाच्या पाठीमागेच आरोपी प्रभाकर याने अर्चना हिला गाठले आणि धारदार कोयत्याने गळा चिरून हत्या केली. मोखाड्यात गुन्हेगारीचा लवलेशही नसताना भरदिवसा तरुणीचा खून होतो, ही घटना वेदनादायी असून या घटनेने आश्रमशाळेतील मुलांचा सुरक्षेचा प्रश्न चव्हाट्यावर आला आहे.