जळगाव मिरर | २७ जून २०२४
मुक्ताईनगर शहरातील बोदवड चौकातील उड्डाणपुलावर ट्रॅक्टर घेऊन जाणाऱ्या कंटेनरला दुचाकीस्वार ओव्हरटेक करत होता. यात दुचाकी घसरल्याने कंटेनरच्या चाकाखाली आल्याने झालेल्या अपघातात दुचाकीस्वाराचा जागीच मृत्यू झाला. तर मागे बसलेला तरुण जखमी झाल्याची घटना मंगळवारी दुपारी ४ वाजेच्या सुमारास घडली.
सविस्तर वृत्त असे मिळालेल्या माहितीनुसार, बुलडाणा जिल्ह्यातील मलकापूर येथील रामदेव बाबानगरमधील अनिल छोटू डागोर (वय ४०) असे मृताचे नाव आहे. दरम्यान, अनिल डागोर हे मित्र अभिषेक टाक यांना सोबत घेऊन मलकापूरकडून भुसावळकडे जात होते दरम्यान, बोदवड चौकात कंटेनरला ओव्हरटेक करत असताना त्यांची दुचाकी घसरली. यात क्लीनर भागाच्या मागच्या चाकाखाली दुचाकी आल्याने अनिल डागोर यांचा जागीच मृत्यू झाला, तर अभिषेक टाक थोडक्यात बचावले. ते ही जखमी झाले आहेत. या घटनेने महामार्गावर काही वेळ वाहतुकीची कोंडी झाली होती. घटनास्थळी मुक्ताईनगर पोलिसांनी धाव घेत मृतदेह ग्रामीण रुग्णालयात आणला. मृत अनिल डागोर हे मलकापूर येथे रेल्वे स्थानकाच्या साफसफाईचा ठेका घेऊन आपला उदरनिर्वाह करत होते. याबाबत मुक्ताईनगर पोलिसांत अपघाताची नोंद करण्यात आली आहे.
