जळगाव मिरर |२५ फेब्रुवारी २०२४
रेल्वेने प्रवास करीत असतांना महिलेची रेल्वे पोलिस कर्मचाऱ्यासोबत ओळख झाली. पोलिसाने महिलेचा विश्वास संपादन करीत तिच्यावर वेळोवेळी अत्याचार केल्याची धक्कादायक घटना उघडकीस आली आहे. तसेच महिलेने विरोध केल्यानंतरही त्या पोलिसाने फोटो व्हायरल करण्याची धमकी देत अत्याचार केले. याप्रकरणी दिनेश पांडुरंग चौधरी (रा. सानपाडा) या रेल्वे पोलिसाविरुद्ध रामानंद नगर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, शहरातील रामानंद नगर पोलिस ठाण्याच्या हद्दीत महिला वास्तव्यास असून त्या रेल्वेने मुंबईला जातांना त्यांची रेल्वे पोलीस दिनेश चौधरी यांच्याशी ओळख झाली. या ओळखीतून त्या पोलिसाने महिलेसोबत संपर्क वाढवून महिलेचा विश्वास संपादन केला. त्यानंतर त्याने या महिलेसोबत जवळीक साधण्याचा प्रयत्न केला. दि. १ एप्रिल २०२३ ते दि. १६ डिसेंबर २०२३ या दरम्यान तो वेळोवळी जळगावला आला व त्याने महिलेच्या घरी जाऊन तिच्यावर अत्याचार केला. या प्रकाराला महिलेने विरोध केला असता तिला मारहाण करीत फोटो व्हायरल करण्याची धमकी दिली. तसेच तुझ्या सर्व नातेवाईकांना या विषयी सांगेल, अशी धमकी देत शारिरीक संबंध ठेवत अत्याचार केला.
रेल्वे पोलिसांकडून वारंवार धमकी देवून होत असलेल्या अत्याचाराला कंटाळून महिलेने रामानंद नगर पोलिस ठाण्यात फिर्याद दिली. त्यावरून दिनेश चौधरी याच्याविरुद्ध गुन्हा दाखल करण्यात आला आहे. पुढील तपास पोउनि प्रदीप बोरुडे करीत आहेत.