जळगाव मिरर | ६ जुलै २०२५
जामनेर तालुक्यातील पहुर घराच्याच बाजूला असलेल्या पत्र्याच्या शेडमध्ये गळफास घेऊन बारावीतील विद्यार्थ्याने आपली जीवनयात्रा संपवल्याची घटना पहूर येथील गोविंद नगरात ४ रोजी रात्री ९ वाजेच्या सुमारास घडली. पहूर येथील महेश अनिल गोल्हारे (वय १८) असे मयत विद्यार्थ्यांचे नाव आहे.
सविस्तर वृत्त असे कि, पहूर पेठ येथील गोविंद नगरातील शेतकरी अनिल कडूबा गोल्हारे हे कुटुंबीयांसोबत राहतात. रात्री ९ वाजेच्या सुमारास महेश गोल्हारे याने घराच्याच बाजूला असलेल्या पत्र्याच्या शेडमध्ये गळफास आवळला. घरच्यांना बाजूच्याच शेडमध्ये गळफास घेतलेल्या अवस्थेत महेश गोल्हारे हा आढळताच त्यांनी मोठा आक्रोश केला.
आजूबाजूच्या लोकांनी त्यास तातडीने उपचारार्थ ग्रामीण रुग्णालयात दाखल केले होते. वैद्यकिय अधिकारी डॉ. बिलाल यांनी तपासणी अंती त्यास मृत घोषित केले. पहूर ग्रामीण रुग्णालयात शवविच्छेदन करण्यात येणार आहे. दरम्यान, मयत महेशच्या पश्चात आई वडील, भाऊ, बहिण असा परिवार आहे. महेश गोल्हारे हा जामनेर येथील इंदिराबाई ललवाणी माध्यमिक व उच्च माध्यमिक विद्यालयात विज्ञान शाखेत बारावीचे शिक्षण घेत होता. त्याने आत्महत्या का केली ? याचे कारण मात्र अद्याप समजले नाही.
