जळगाव मिरर | १५ डिसेंबर २०२४
चोपडा तालुक्यातील अडावद पोलिस ठाण्याचे पोलिस हेडकॉन्स्टेबल संजय आत्माराम पाटील (वय ५१) यांचा दुर्दैवी मृत्यू झाल्याची घटना उघडकीस आली आहे. गेल्या दोन दिवसांपासून रेल्वे अपघातात छिन्नविछिन्न स्थितीत असलेल्या मृतदेहाची ओळख आज नातेवाईकांकडून पटल्याने शवविच्छेदन करून त्यांचा मृतदेह नातेवाईकांच्या ताब्यात देण्यात आला. या घटनेचे वृत्त चोपडयात धडकताच सर्वत्र शोककळा पसरली आहे.
याबाबत पोलिसांकडून प्राप्त माहिती अशी की, १२ रोजी दुपारी ४.३० वाजेच्या सुमारास टाकरखेडा ते अमळनेर नजीक असलेल्या मालधक्का रेल्वे पटरीवर एका व्यक्तीचा मृतदेह चेहरा छिन्नविछिन्न अवस्थेत रेल्वे पोलिसांना आढळून आला होता. त्यानंतर हा मृतदेह अमळनेर पोलिसांकडे सोपवण्यात आल्यानंतर त्या मृतदेहाची ओळख पटवण्याचे काम सुरू झाले. तर हा मृतदेह ग्रामीण रुग्णालयात ठेवण्यात आला होता. दरम्यान, पोलिस तपास सुरू असतानाच आज चोपडा शहर पोलिसांत मिसिंग दाखल झाली. तर त्यांच्या नातेवाईकांकडे पोलिसांनी या मृतदेहाची ओळख पटवण्याचे आवाहन केले. त्यानंतर त्यांना मयत व्यक्तीचे कपडे व चप्पल दाखवण्यात आली. त्यावरुन तो मृतदेह पोलिस हेडकॉन्स्टेबल संजय पाटील यांचाच असल्याचे त्यांच्या पत्नीने ओळखले.
त्यानंतर त्यांनी अमळनेर ग्रामीण रुग्णालयात जाऊन खात्री केली असता पत्नीने आपल्याच पतीचा हा मतदेह असल्याचे खात्रीने सांगितले. त्यानंतर शवविच्छेदन करुन हा मृतदेह नातेवाईकांच्या ताब्यात देण्यात आला. याबाबत अमळनेरचे स्टेशन मास्तर यांच्या खबरीवरून पोलिसंत अकस्मात मृत्यूची नोंद करण्यात आली आहे. या घटनेचा तपास पो.हे. कॉ. गणेश पाटील करत आहेत. दरम्यान, पोलिस हेडकॉन्स्टेबल संजय पाटील हे चोपडा येथील महावीर नगरातील रहिवासी असून ते शांत व मनमिळाऊ स्वभावाचे होते. त्यांनी चोपडा ग्रामीण पोलिस ठाणे, अमळनेर पोलिस स्टेशन येथे सेवा बजावली असून सध्या ते अडावद पोलिस ठाणे या ठिकाणी उत्कृष्ट सेवा बजावत होते. त्यांच्या पश्चात पत्नी, मुलगा, मुलगी असा परिवार आहे.
