जळगाव मिरर | २७ जुलै २०२५
आसारी घेऊन जात असलेला ट्रक पुलाचा कठडा तोडून नाल्यात कोसळल्याने चालक धर्मेंद्रसिंग शंकरसिंग राजपूत (३५, रा. बहाद्दरपूर, जि. रतलाम, मध्य प्रदेश) हे ठार झाले. तसेच ट्रकमधील दोघे जण जखमी झाले. हा अपघात म्हसावद ते वावडद्यादरम्यान २५ जुलै रोजी मध्यरात्री दोन वाजेच्या सुमारास झाला. या प्रकरणी एमआयडीसी पोलिस ठाण्यात चालकाविरुद्ध गुन्हा दाखल करण्यात आला आहे.
सविस्तर वृत्त असे कि, मध्य प्रदेशकडून आसारी घेऊन जाणारा एक ट्रक तालुक्यातील म्हसावद ते वावडदा दरम्यान करकर नाल्याजवळ आला असताना चालकाचा ताबा सुटला व हा ट्रक कठडा तोडून नाल्यात कोसळला. या अपघातात चालक धर्मेंद्रसिंग राजपूत यांना जबर मार लागला. तर कालुसिंग हिरालाल राठोड व राहुल राठोड (दोघे रा. बहाद्दरपूर, जि. रतलाम, मध्य प्रदेश) हे दोघे जण जखमी झाले. अपघातानंतर जखमींना शासकीय वैद्यकीय महाविद्यालय व रुग्णालयात दाखल केले असता धर्मेंद्रसिंग यास डॉक्टरांनी मृत घोषित केले. या प्रकरणी कालू राठोड यांनी एमआयडीसी पोलिस ठाण्यात फिर्याद दिली. त्यावरून चालकाविरुद्ध गुन्हा दाखल करण्यात आला आहे.
