जळगाव मिरर | २१ जून २०२६
ट्रकवर दगडफेक करुन चालकावर धारदार चाकूने वार केले. त्यानंतर चालकाजवळील रोकड जबरीने चोरुन नेल्याची घटना शुक्रवारी मध्यरात्री घडली होती. घटनेचे गांभीर्य लक्षात घेत तालुका पोलिसांच्या गुन्हे शोध पथकाने तपासचक्रे फिरवित अवघ्या १२ तासात संशयित साहिल शेख जब्बार शेख (वय २६, रा. पाळधी, भवानी मंदिरासमोर), विशाल चुडामन पाटील (वय १८, रा. हॉटेल साई पॅलेस मागे, बिबा नगर) व मोहित हेमंत गुजर (वय १९, रा. मयूर कॉलनी, पिंप्राळा) या तिघांच्या मुसक्या अवळल्या असून चौथा साथीदार मात्र फरार असून त्याचा कसून शोध सुरु आहे.
मिळालेल्या माहितीनुसार, जालना येथील ट्रक चालक मुकेश रामराव राठोड (वय ३०) ह शुक्रवारी मध्यरात्री १ वाजता (एमएच २१, बीएच ३५३६) क्रमांकाचा ट्रक घेवून पाळधीकडून जळगावकडे येत होते. यावेळी चारचाकीसह दुचाकीवरुन आलेल्या संशयितांनी त्यांचा ट्रक अडवून ट्रकवर दगडफेक करण्यास सुरुवात केली. त्यानंतर क्लीनरसह ट्रक चालकाला मारहाण करीत त्याच्या हातावर तीन वेळा चाकूने वार करीत गंभीर जखमी करुन त्याच्या खिशात असलेली साडेपाच हजार रुपये आणि फोन पे मधील ९८४ रुपये जबरदस्तीने ट्रान्सफर करुन घेत संशयित घटनास्थळहून पसार झाले होते. जखमी ट्रक चालक मुकेश राठोड याच्यावर रुग्णालयात उपचार सुरु आहे. त्याने दिलेल्या फिर्यादीवरुन अज्ञात संशयिताविरुद्ध गुन्हा दाखल करण्यात आला.
पोलिसांनी मुख्य संशयित साहील शेख, विशाल पाटील व मोहीम गुजर या तिघांच्या मुसक्या आवळल्या. तर त्यांचा चौथा साथीदार मात्र अद्याप फरार असून त्याचा कसून शोध घेतला जात आहे. दरम्यान, मुख्य संशयित शेख साहील शेख जब्बार याच्याविरुद्ध यापुर्वी देखील बस अडवून बसचालकास मारहाण करणे संदर्भात धरणगाव पोलीस ठाण्यात गुन्हा दाखल आहे.
घटनेचे गांभीर्य लक्षात घेत तालुका पोलीस स्टेशनचे पोलीस निरीक्षक शशिकांत पाटील यांनी तात्काळ गुन्हे शोध पथकातील सपोनि नयन पाटील, पोहेकॉ प्रदीप राजपूत, अविनाश देवरे, योगेश पाटील, कैलास इंगळे, प्रशांत ठाकूर यांचे पथक रवाना केले. या पथकाने तांत्रिक विश्लेषणासह गुप्त माहितीच्या आधारावर अवघ्या १२ तासात जबरी चोरी करणाऱ्या टोळीचा पर्दाफाश केला.
