जळगाव मिरर | २० ऑगस्ट २०२५
कौटुंबिक कारणावरुन वाद होवून संतप्त झालेल्या पतीने पत्नीवर कुऱ्हाडीने वार केले. त्यानंतर स्वतः रेल्वेखोली झोकून देत आत्महत्या केली. ही धक्कादायक घटना मंगळवारी पहाटे सहा वाजेच्या सुमारास जळगाव तालुक्यातील बोरनार गावात घडली, या घटनेमध्ये आनंदा उर्फ महारु धामोळे (वय ४५) यांचा मृत्यू झाला असून त्यांची पत्नी रेखा धामोळे (वय ४१) हे गंभीर जखमी झाले असून त्यांच्यावर खासगी रुग्णालयात उपचार सुरु आहे.
सविस्तर वृत्त असे कि, जळगाव तालुक्यातील बोरनार येथे आनंदा धामोळे हे कुटुंबियांसह वास्तव्यास असून ते शेती करुन कुटुंबाचा उदनिर्वाह करीत होते. मंगळवार दि. १९ रोजी पहाटे साडेपाच वाजेच्या सुमारास धामोळे दाम्पत्यामध्ये कौटुंबिक कारणावरुन वाद झाला. या वादातून संतप्त झालेल्या आनंदा धामोळे यांनी रागाच्या भरात पत्नी रेखा यांच्या डोक्यात कुऱ्हाडीने वार केले. या हल्ल्यात रेखा धामोळे गंभीर जखमी होवून रक्ताच्या थारोळ्यात पडलेल्या होत्या. पत्नीचा मृत्यू झाला असे समजून, आनंदा धामोळे यांनी सकाळी ६ वाजता घराबाहेर पडले आणि त्यांनी म्हसावद रेल्वे गेटजवळ जावून त्यांनी धावत्या रेल्वेखाली स्वतःला झोकून देत आत्महत्या केली. पतीने केलेल्या प्राणघातक हल्ल्यात गंभीर जखमी झालेल्या रेखा धामोळे यांना तात्काळ जिल्हा शासकीय वैद्यकीय महाविद्यालय व रुग्णालयात उपचारासाठी दाखल करण्यात आले. प्राथमिक उपचारानंतर त्यांना पुढील उपचारांसाठी छत्रपती संभाजीनगर येथे हलवण्यात आले असून, त्यांची प्रकृती अद्यापही गंभीर असल्याचे त्यांच्या नातेवाईकांनी सांगितले.
धामोळे दाम्पत्याला विनोद आणि पप्पू ही दोन मुले आहे. ते घटनेच्या वेळी खालच्या घरात झोपलेले होते, तर दाम्पत्य हे वरच्या खोलीत झोपलेले होते. सकाळी ६ वाजता मोठा मुलगा विनोद हा झोपेतून उठल्यानंतर तो वरच्या खोलीत गेला. यावेळी त्याला आई रक्ताच्या थारोळ्यात पडलेली दिसताच त्याला धक्का बसला. त्याने शेजारच्यांच्या मदतीने जखमी अवस्थेत असलेल्या आईला रुग्णालयात हलविले. नातेवाईकांनी दिलेल्या माहितीनुसार, गेल्या काही दिवसांपासून पती-पत्नीमध्ये काही विषयांवरून किरकोळ वाद सुरू होते. मंगळवारी पहाटेही त्यांच्यात वाद झाले, याच वादातून हा दुर्दैवी प्रकार घडला. मात्र, या वादाचे नेमके कारण अद्याप स्पष्ट झालेले नाही. या प्रकरणी एमआयडीसी पोलीस ठाण्यात नोंद करण्यात आली असून, पोलीस पुढील तपास करत आहेत.
