जळगाव मिरर | ७ जून २०२५
बोदवड येथील रेल्वे स्थानकाच्या उपलाइनवर अमरावती-सुरत एक्स्प्रेस जात असताना कनवरलाल एकनाथ अठ्ठकाळे (वय ४३, रा. हरताळा, ता. मुक्ताईनगर) हा बसचालक फलाटावरून उतरून थेट रेल्वे लाइनवर आडवा झाला. यामुळे भरधाव एक्स्प्रेसखाली चिरडून तो जागीच ठार झाला. शुक्रवार ६ रोजी दुपारी दोन वाजेच्या सुमारास ही दुर्घटना घडली.
मिळालेल्या माहितीनुसार, कनव्हरलाला हा पुणे महानगरपालिकेचा बसचालक होता. गत महिन्यातच मुलीचे लग्न झाले असून मुलगा दहावीचे शिक्षण घेत आहे. सकाळी तो पत्नीसोबत मुक्ताईनगरच्या रुग्णालयात जाऊन आला व पत्नीला घरी सोडत ‘भी मित्रांना भेटून येतो’ असे सांगून थेट बोदवड रेल्वे स्थानक त्याने गाठले व मोबाइलवर मुलाला संदेश पाठवत आत्महत्या करत असल्याचे कळविले.
त्यास फुप्फुसाचा कर्करोग असल्याने त्याच्यावर उपचार सुरू होते. या आजाराला कंटाळून त्याने हे कृत्य केल्याचे सांगण्यात आले आहे. त्याच्या पश्चात पत्नी, मुलगा व मुलगी असा परिवार आहे.
