पाटणा : बिहारमध्ये बाबू वीर कुंवर सिंह यांची जयंती भव्यदिव्य स्वरुपात साजरी केली जाणार आहे. त्यांचाच एक भाग म्हणून वीर कुंवर सिंह विजयोत्सव कार्यक्रम आयोजित करण्यात आला आहे. केंद्रीय गृहमंत्री अमित शाह या कार्यक्रमासाठी बिहारच्या दौऱ्यावर जाणार आहेत. बिहार भाजपकडून देण्यात आलेल्या माहितीनुसार भोजपूरमधील जगदीशपूर येथील दुलौर मैदानात अमित शाह यांच्या उपस्थितीत ७५ हजार राष्ट्रध्वज एकाचवेळी फडकावले जाणार आहेत. यानिमित्तानं विश्वविक्रम करण्याचा प्रयत्न करण्यात येणार आहे. हा कार्यक्रम यशस्वी झाल्यानंतर आतापर्यंत पाकिस्तानच्या नावावर असलेला विश्वविक्रम भारताच्या नावावर होणार आहे. इतक्या मोठ्या संख्येनं राष्ट्रध्वज फडकवण्याचा विक्रम पाकिस्तानच्या नावावर आहे.
बिहार भाजपचे अध्यक्ष डॉ. संजय जयस्वाल यांनी गिनीज बुक ऑफ वर्ल्ड रेकॉर्डला या कार्यक्रमासंदर्भातील माहिती मिळाल्यानंतर त्यांचा प्रतिनिधी पाठवण्याची इच्छा व्यक्त केल्याची माहिती दिली. शनिवारी वीर कुंवर सिंह विजयोत्सव कार्यक्रमात ७५ हजार राष्ट्रीय ध्वज म्हणजेच तिरंगा फडकावला जाईल. या कार्यक्रमाला त्यांचे प्रतिनिधी उपस्थित असतील, असं जयस्वाल यांनी म्हटलं.
संजय जयस्वाल यांनी यापूर्वी मोठ्या संख्येनं राष्ट्रध्वज एकावेळी फडकवण्याचा विक्रम पाकिस्तानच्या नावावर असल्याची माहिती दिली. पाकिस्तानात २००४ मध्ये ५७ हजार ६३२ राष्ट्रध्वज एकावेळी फडकवण्यात आले होते.भोजपूर भाजपच्यावतीनं या कार्यक्रमाची तयारी गेल्या काही महिन्यांपासून करण्यात आली आहे.
कोण आहे बाबू वीर कुंवर सिंह?
बाबू वीर कुंवर सिंह यांच्या भारतीय स्वातंत्र्य लढ्यातील योगदानाचं स्मरण म्हणून बिहारमध्ये विजयोत्सवाचं आयोजन करण्यात आलं आहे. बिहारमध्ये स्वातंत्र्यांचा अमृत महोत्सव या कार्यक्रमांतर्गत वीर कुंवर सिंह यांच्या जंयतीनिमित्त हा कार्यक्रम घेण्यात आला आहे. वीर कुंवर सिंह यांनी १८५७ च्या युद्धात इंग्रजांवर विजय मिळवला होता.वीर कुंवर सिंह यांचा जन्म १३ नोव्हेंबर १७७७ ला झाला होता. १८५७ च्या स्वातंत्र्यलढ्यात त्यांचं प्रमुख योगदान राहिलं होतं. वयाच्या ८० व्या वर्षी कुंवर सिंह यांनी इंग्रंजाचा पराभव केला होता. एप्रिल १८५७ ला झालेल्या लढाईत कुंवरसिंह यांनी ईस्ट इंडिया कंपनीचा पराभव केला होता. एप्रिल १८५८ जगदीशपूरच्या लढाईत ईस्ट इंडिया कंपनीचा पराभव केल्यानंतर २६ एप्रिल १८५८ कुंवरसिंह यांना वीरमरण आलं होतं. त्या घटनेच्या स्मरणार्थ हा कार्यक्रम आयोजित करण्यात आला आहे.
