जळगाव मिरर | २४ जून २०२३
राज्यातील भारतीय जनता पार्टीवर नाराज असलेले पंकजा मुंडे यांनी आपली नाराजी नेहमी उघडपणे बोलून दाखविलेली आहे. त्यामुळे सर्वच राजकीय पक्ष त्यांच्या प्रत्येक हालचालीवर लक्ष ठेवून असतांना पंकजा मुंडेंनी बीआरएसनं ऑफर दिल्याची माहिती समोर आली असतानाच एमआयएमही त्यांच्यासाठी आग्रही आहे.
दोन वर्षांपूर्वी पंकजा मुंडेंना एमआयएमनंही पक्षात येण्याची ऑफर दिल्याचा दावा असदुद्दीन ओवैसी यांनी केलाय. ते संभाजीनगरमध्ये बोलत होते. पंकजा मुंडेंच्या ठाकरे गटात जाण्याच्या चर्चा सुरू असतानाच बीआरएसनंही त्यांना ऑफर दिलीय. पंकजा मुंडे यांच्यासाठी अनेक पक्षांनी फिल्डिंग लावल्याचं या निमित्तानं अधोरेखित झालंय. पंकज मुंडेंना दोन वर्षांपूर्वीच इम्तियाज जलिल म्हणाले होते, असं असदुद्दीन ओवैसी म्हणाले आहेत. तर बीआरएसने पंकजा मुंडे यांना थेट मुख्यमंत्रिपदाचीही ऑफर दिली आहे. या चर्चांवर आता पंकजा मुंडे काय उत्तर देणार? हे पाहणं औत्सुक्याचं ठरणार आहे.
पंकजा मुंडे यांनी बीआरएस पक्षात यावे, त्यांना मुख्यमंत्री करू, अशी ऑफर बीआरएस पक्षाचे राज्य समन्वयक बाळासाहेब सानप आणि शिवराज बांगर यांनी दिली आहे. भाजपमध्ये पंकजा मुंडेंना डावललं जात आहे, त्यांच्या कार्यकर्त्यांमध्ये घुसमट आहे, त्यांनी भाषणामध्येही नाराजी बोलून दाखवली, असा दावाही बीआरएसने केला आहे. ‘बीआरएस संपूर्ण ताकदीने महाराष्ट्रात विधानसभा निवडणूक लढवणार आहे. पंकजा मुंडे यांनी बीआरएसमध्ये येऊन शेतकऱ्याचे सरकार राज्यात आणण्यासाठी सोबत यावं. महाराष्ट्राची पहिली महिला मुख्यमंत्री म्हणून बीआरएस त्यांचा विचार करेल,’ असं बीआरएसने सांगितलं आहे.
