जळगाव मिरर | २९ नोव्हेबर २०२३
राज्यातील अनेक जिल्ह्यात आगीच्या घटना घडत असतांना एक भीषण आगीची घटना मुंबईतील चेंबुर परिसरातून समोर आली आहे. एका घरात गॅस सिलिंडरचा मोठा स्फोट झाल्याने घर कोसळल्याची दुर्देवी घटना घडली असून यात चार जण जखमी झाले असून त्यांना जवळच्या रुग्णालयात पाठवण्यात आले आहे.
मिळालेल्या माहितीनुसार, जुनी बॅरॅक गोल्फ क्लबजवळ असलेल्या एका 1+1 घरांच्या चाळीत ही घटना घडली आहे. चाळीतील सलग ४ आणि ५ व्या क्रमांकाच्या घरात स्फोट झाला आहे. सुदैवाने या घटनेत कोणतीही जीवितहाणी झालेली नाही. मात्र जण गंभिर जखमी असल्याचे समजले आहे. घटना घडताच नागरिकांची आपला जीव वाचवण्यासाठी धावपळ सुरू झाली. यामध्ये वरच्या मजल्यावरील व्यक्ती वरतीच अडकल्या होत्या.
घटनेची माहिती मिळताच पोलिसांसह अग्निशमन दलाच्या गाड्या घटनास्थळी दाखल झाल्या. तसेच बचाव पथकही घटनास्थळी दाखल झाले. वरती अडकलेल्या व्यक्तींची सुखरुप सुटका करण्यासाठी शर्थिचे प्रयत्न करण्यात आले. या घटनेमध्ये आतापर्यंत ११ जणांची पहिल्या मजल्यावरून सुखरूप सुटका करण्यात आली आहे. तर ४ जखमी व्यक्तींना जवळच्या रुग्णालयात दाखल केले आहे. विकास अंभोरे (वय ५०), अशोक अंभोरे (२७ वर्षे), सविता अंभोरे (४७ वर्षे), रोहित अंभोरे (२९ वर्षे) अशी जखमी व्यक्तींची नावे आहेत.
