जळगाव मिरर | १० जुलै २०२४
कामावरून घरी जात असलेल्या दुचाकीस्वार तरुणाला समोरुन भरधाव वेगाने येणाऱ्या डंपरने जोरदार धडक दिली. या अपघातात दत्तू प्रकाश पाटील (वय ३४, रा. फुलपाट, ता. धरणगाव) हा तरुण गंभीर जखमी झाल्याची घटना दि. ५ जुलै रोजी घडली होती. जिल्हा शासकीय वैद्यकीय महाविद्यालयात त्याच्यावर उपचार सुरु असतांना चार दिवसानंतर त्याची प्राणज्योत मालवली. मंगळवारी सकाळी ११ वाजता शासकीय वैद्यकीय महाविद्यालयात शवविच्छेदन करून मृतदेह नातेवाईकांच्या ताब्यात देण्यात आला आहे.
मिळालेल्या माहितीनुसार, धरणगाव तालुक्यातील फुलपाट गावात दत्तू पाटील हा तरूण आईवडील, पत्नी, भाऊ आणि दोन मुलांसह वास्तव्याला होता. टाकरखेडा येथील एका कंपनीत कॉन्ट्रॅक्टर म्हणून काम पाहत होता. दैनंदिनीप्रमाणे शुक्रवारी ५ जुलै रोजी दुपारी साडेतीन वाजेच्या सुमारास दत्तू पाटील हा दुचाकी क्रमांक (एमएच १९ बीटी १०१५) ने कंपनीतून घरी फुलपाट येथे जाण्यासाठी निघाला. त्यावेळी पाळधी गावातील सुगोकी हॉटेलसमोर भरधाव वेगाने येणाऱ्या एका डंपरने जोरदार धडक दिली. या धडकेत दत्तू पाटील हा गंभीर जखमी झाला. त्याला जळगाव येथील खासगी रूग्णालयात दाखल करण्यात आले होते.
गंभीर जखमी झालेल्या दत्तू पाटील याच्यावर चार दिवसांपासून उपचार सुरू असतांना सोमवार दि. ८ जुलै रोजी रात्री ११ वाजता प्राणज्योत मालविली. वैद्यकीय अधिकाऱ्यांनी त्याला मयत घोषीत केल्यानंतर त्याच्या कुटुंबियांनी रुग्णालयात एकच अक्रोश केला. मंगळवारी सकाळी शासकीय वैद्यकीय महाविद्यालयात शवविच्छेदन करून मृतदेह नातेवाईकांच्या ताब्यात देण्यात आला आहे. याप्रकरणी पोलिसात अकस्मात मृत्यूची नोंद करण्यात आली आहे.
