जळगाव मिरर | ९ जानेवारी २०२५
फेब्रुवारी 2023 मध्ये झालेल्या एका तरुणाच्या हत्येचा बदला म्हणून संशयीत आरोपीचा गोळ्या घालून खून करण्यात आले. ही धक्कादायक घटना शुक्रवारी सकाळी साडेसात वाजता भुसावळातील खडका रोडवरील अमरदीप टॉकीज जवळच्या डीडी सुपर कोल्ड्रिंक्स आणि चहाच्या दुकानात घडली. मृत व्यक्तीचे नाव तेहरीन नासीर शेख (27, मच्छीवाडा, जाम मोहल्ला, भुसावळ) आहे.
प्राथमिक माहितीप्रमाणे, तेहरीन नासीर शेख सकाळी साडेसात वाजता चहा पिण्यासाठी डीडी सुपर कोल्ड्रिंक्स आणि चहाच्या दुकानात आला. यावेळी दोन दुचाकींवर आलेल्या तोंडाला रूमाल बांधलेल्या चार संशयीतांपैकी तिघांनी आपल्याकडील गावठी पिस्टलने पाच गोळ्या झाडल्या. या घटनेनंतर दुकानात असलेल्या ग्राहकांमध्ये गोंधळ उडाला आणि काही वेळातच संशयीत दुचाकीवरून पळून गेले.
गोळ्या शरीरातील विविध भागांमध्ये लागल्याने तेहरीनचा जागीच मृत्यू झाला. घटनेची माहिती मिळताच पोलीस उपअधीक्षक कृष्णात पिंगळे, पोलीस निरीक्षक राहुल वाघ आणि अन्य सहकारी घटनास्थळी पोहोचले. सध्या संशयीतांचा शोध घेण्याचे कार्य सुरू आहे. फेब्रुवारी 2023 मध्ये झालेल्या एका खुनाचा बदला म्हणून या खुनाची घटना घडल्याची प्राथमिक माहिती समोर आली आहे.
