जळगाव मिरर | ६ एप्रिल २०२६
भोंदुगिरीच्या आड काळा पैसा पांढरा करण्याचा मोठा उद्योग उभारल्याचा संशय असलेल्या अशोक खरात प्रकरणात धक्कादायक माहिती समोर आली आहे. हवाला रॅकेटच्या माध्यमातून कोट्यवधी रुपयांची देवाणघेवाण केल्याचा आरोप असून या रॅकेटचे जाळे थेट दुबईपर्यंत पोहोचल्याचे तपासातून उघड झाले आहे.
तपास यंत्रणांच्या माहितीनुसार, अशोक खरात याने मुंबईतील एका पंचतारांकित हॉटेलमध्ये दररोज सुमारे २५ हजार रुपये भाड्याने आलिशान रूम घेतली होती. याच ठिकाणाहून तो मोठ्या प्रमाणावर आर्थिक व्यवहार करत असल्याचे समोर आले आहे. एसआयटीने केलेल्या तपासात त्याच्या दोन मोबाईलमधून महत्त्वपूर्ण पुरावे हाती लागले असून, त्यामध्ये चॅट, व्हॉइस नोट्स आणि ऑडिओ क्लिप्सचा समावेश आहे.
नाशिक आणि पुणे परिसरातील किमान पाच जणांचा सहभाग असलेल्या या हवाला रॅकेटमध्ये बांधकाम व्यावसायिकांचाही हात असल्याचे समोर आले आहे. या माध्यमातून कोट्यवधी रुपयांचे संशयास्पद व्यवहार करण्यात आल्याचा तपास यंत्रणांचा दावा आहे. विशेष म्हणजे, खरातच्या माध्यमातून जमीन बळकावण्याचे प्रकार घडल्याचा आरोप असून एका बिल्डरचा तब्बल ३०० कोटी रुपयांचा व्यवहार वादात सापडला आहे.
तक्रारदाराच्या म्हणण्यानुसार, देवदर्शनाच्या बहाण्याने महाराष्ट्र आणि कर्नाटकातील सहकारी पतसंस्थांमध्ये इतरांच्या पॅन व आधार कार्डचा गैरवापर करून बनावट खाती उघडण्यात आली. या खात्यांच्या माध्यमातून काळ्या पैशांची मोठ्या प्रमाणावर उलाढाल करण्यात आली असल्याचा संशय तपास पथकाने व्यक्त केला आहे.
दरम्यान, या प्रकरणात आणखी एक गंभीर बाब समोर आली आहे. समता पतसंस्थेच्या राहाता शाखेत २०२१ मध्ये नियमबाह्य पद्धतीने तब्बल १०० खाती उघडण्यात आली होती. या खात्यांमधून आतापर्यंत ६० कोटी रुपयांहून अधिक रकमेची संशयास्पद देवाणघेवाण झाल्याची माहिती उघड झाली आहे. या प्रकरणी संबंधित शाखा व्यवस्थापकासह अशोक खरात याच्याविरुद्ध नवीन गुन्हा दाखल करण्यात आला आहे.
शिर्डी पोलिसांनी १९ खातेदारांची सखोल चौकशी सुरू केली असून या चौकशीतून संपूर्ण रॅकेटचा पर्दाफाश झाला आहे. प्राथमिक तपासात बँकिंग यंत्रणेचा मोठ्या प्रमाणावर गैरवापर झाल्याचे स्पष्ट झाले आहे. या संपूर्ण प्रकरणामुळे नाशिक-पुणे परिसरात खळबळ उडाली असून हवाला, जमीन व्यवहार आणि भोंदुगिरी यांचा संगनमताने उभारलेला मोठा आर्थिक घोटाळा उघडकीस येण्याची शक्यता व्यक्त केली जात आहे. पुढील तपास सुरू आहे.
