जळगाव मिरर | २ जुलै २०२६
खेळण्याच्या बहाण्याने चार वर्षीय भाचीला बोलवून तिच्यावर अत्याचार केल्याची घटना सन २०२२ मध्ये नशिराबाद पोलिस ठाण्याच्या हद्दीत घडली होती. याप्रकरणी अत्याचार करणाऱ्या चुलत मामाला दोषी ठरवित २० वर्षे सक्तमजुरी व २० हजार रुपयांचा दंड अशी न्यायालयाने शिक्षा सुनावली.
मिळालेल्या माहितीनुसार, मध्यप्रदेशातील एक कुटुंब कामासाठी नशिराबाद पोलिस ठाण्याच्या हद्दीतील मन्यारखेडा परिसरात आले होते. दि. १४ जानेवारी २०२२ रोजी दुपारी १२ वाजेच्या सुमारास या कुटुंबातील ४ वर्षीय बालिकेला तिच्या चुलत मामाने खेळण्यासाठी बोलविले आणि तिच्यावर अत्याचार केला होता. या प्रकरणी नशिराबाद पोलिस ठाण्यात चुलत मामाविरुद्ध गुन्हा दाखल करण्यात आला होता.
न्यायालयात दोषारोप पत्र सादर झाल्यानंतर सरकार पक्षातर्फे १२ साक्षीदार तपासण्यात आले. सर्व बाजू ऐकून न्या. पी.पी. बनकर यांनी दि. १ जुलै २०२६ रोजी निकाल देत अल्पवयीन भाचीवर अत्याचार करणाऱ्या चुलत मामाला २० वर्षे सक्तमजुरी, २० हजार रुपये दंड व दंड न भरल्यास २ महिने कारावास अशी शिक्षा सुनावली. दंडाच्या रकमेतून १५ हजार रुपये पीडितेला देण्याचा आदेशही न्यायालयाने दिला आहे. सरकार पक्षातर्फे जिल्हा सरकारी वकील अॅड. सुरेंद्र काबरा यांनी प्रभावी युक्तीवाद केला. पैरवी अधिकारी म्हणून अमोल पाटील व केस वॉच म्हणून पोलिस निरीक्षक गुणवंत सोनवणे यांनी मदत केली.
