मुंबई : वृत्तसंस्था
शिवसेनेचे धनुष्यबाण चिन्ह शिंदे गटाचे की ठाकरे गटाचे, याबाबतचा केंद्रीय निवडणूक आयोगाचा आज येणारा निर्णय लांबणीवर पडला आहे. आता सोमवारी निर्णय येण्याची शक्यता आहे. दोन्ही गटाकडून कागदपत्रे देण्यासाठी जोरदार हालचाली सुरू आहेत.
आजच्या सुनावणी संदर्भात निवडणूक आयोगाने शिवसेनेला मध्यरात्री ई-मेल केला होता. शिवसेनेला 2 वाजेपर्यंतची वेळ दिली होती. त्यावर शिवसेनेच्या ठाकरे गटाने 800 पानांचे उत्तर निवडणूक आयोगाला सादर केले. हे 800 पानी उत्तर पक्षातील फुटीबाबतची माहिती देणारे होते. त्यानंतर आज शिवसेनेने वकिलांमार्फत निवडणूक चिन्ह धनुष्यबाणाबाबत दावा सादर केला.
शिवसेनेच्या शिंदे आणि ठाकरे गटांना पुरावे सादर करण्यासाठी निवडणूक आयोगाने दिलेली मुदत आज संपली आहे. त्या पार्श्वभूमीवर ठाकरे गट आज दुपारी आपली कागदपत्रे दाखल केले. ही कागदपत्रे तपासून निवडणूक आयोग आपला निर्णय देणार आहे.
अंधेरीची पोटनिवडणूक जाहीर झाली आहे. त्यासाठी आजपासून उमेदवारी अर्ज भरायला सुरुवात होतेय. त्यातच पक्ष चिन्हाचा मुद्दा निवडणूक आयोगासमोर आहे. हे पाहता धनुष्यबाण हे चिन्ह तात्पुरते गोठवले जाण्याची शक्यता आहे. यापूर्वी अनेकदा असे प्रसंग उद्भवले असून, त्यावेळी चिन्ह गोठवण्यात आले आहे.
चिन्ह गोठवले तर?
निवडणूक आयोगाने चिन्ह गोठवले अथवा एखाद्या गटाला चिन्ह दिले, तर पुढे काय, याची तयारीही उद्धव ठाकरे आणि एकनाथ शिंदे यांनी करून ठेवल्याचे समजते. ठाकरे गटाकडून सध्या गदा चिन्ह घेण्यावर विचार सुरू आहे. तर शिंदे सेना तलवार हे चिन्ह घेण्यासाठी उत्सुक असल्याचे समजते. दसरा मेळाव्यातही एकनाथ शिंदेच्या भाषणापूर्वी एक तलवारही व्यासपीठावर आणण्यात आली होती. ही त्याची तयारी असल्याचे समजते.
