जळगाव मिरर | १३ डिसेंबर २०२३
जळगाव शहरातील अनेक रस्त्यावर छोटे मोठे अपघाताची मालिका सुरु असतांना नुकतेच जिल्हाधिकारी निवासस्थानसमोरील मुख्य रस्त्यावर पायी जणाऱ्या बहिण भावांसह त्यांच्या आजीला एका दुचाकीस्वराने जोरदार धडक दिल्याने तिघे जखमी झाल्याची घटना घडली असून याप्रकरणी रामानंदनगर पोलीस स्थानकात अनोळखी दुचाकीस्वाराविरोधात गुन्हा दाखल करण्यात आला आहे.
मिळालेल्या माहितीनुसार, प्रेरणा हरीचंद्र पाटील या तरूणी जळगाव शहरातील व्यंकटेश कॉलनीत आपल्या परिवारासह रहिवासास असून दि. १२ डिसेंबर मंगळावर रोजी सायंकाळी साडेपाच वाजेच्या सुमारास प्रेरणा पाटील या त्यांचा भाऊ वैष्णव वारके आणि आजी संजीवनी वारके यांच्यासोबत जिल्हाधिकारी निवासस्थानाजवळील मुख्य रस्त्यावर पायी जात होते. त्यावेळी दुचाकी क्रमांक (एमएच १९ डीआर ५६४६) वरील अज्ञात चालकाने तिघांना जोरदार धडक दिली. या धडकेत तिघेजण गंभीर जखमी झाले. अपघात घडल्यानंतर दुचाकीस्वार हा दुचाकी घेवून पसार झाला. हा प्रकार घडल्यानंतर रात्री १० वाजता रामानंदनगर पोलीस ठाण्यात अज्ञात दुचाकीधारकाविरोधात गुन्हा दाखल करण्यात आला. पुढील तपास पोहेकॉ सुनिल पाटील हे करीत आहे.
