जळगाव मिरर | ८ एप्रिल २०२४
पंतप्रधान नरेंद्र मोदी यांच्या प्रचाराचा पहिला नारळ हा महाराष्ट्रातील चंद्रपूर मध्ये फुटत असून हा केवळ योगायोग नाही, तर हे येथील विजयाची नांदी असल्याचे मत मुख्यमंत्री एकनाथ शिंदे यांनी व्यक्त केले. चंद्रपूर लोकसभा मतदार संघात भाजपचे उमेदवार सुधीर मुनगंटीवार यांच्या प्रचारासाठी पंतप्रधान नरेंद्र मोदी यांची पहिली सभा आज चंद्रपुरात पार पडली. या वेळी मुख्यमंत्री एकनाथ शिंदे बोलत होते.
काँग्रेसने जाहीरनामा प्रसिद्धीकरण केला आहे. मात्र, जाहीरनामा प्रसिद्ध करण्याचा त्यांना अधिकार नाही. भारताला खड्ड्यात घातल्याबद्दल त्यांनी माफीनामा प्रसिद्ध करायला हवा होता, अशी घणाघाती टीका मुख्यमंत्री एकनाथ शिंदे यांनी केली आहे. काँग्रेसकडे पन्नास वर्षांचा हिशोब मागितला पाहिजे, असे देखील मुख्यमंत्री म्हणाले बाळासाहेब ठाकरे यांचे राम मंदिराचे स्वप्न पंतप्रधान नरेंद्र मोदी यांनी पूर्ण केले असल्याचे एकनाथ शिंदे यांनी म्हटले आहे.
पंतप्रधान नरेंद्र मोदी यांनी या देशाला मजबूत केले आहे. आपल्या देशाला महासत्तेकडे घेऊन जाण्याचे काम पंतप्रधान नरेंद्र मोदी यांनी केले आहे. समान नागरी कायदा नको आहे, असे म्हणणाऱ्या विरोधकांना मात्र समलिंगी संबंध हवे आहेत. अशा प्रकारचे लोक आपल्यासमोर उभे असल्याचे मुख्यमंत्री एकनाथ शिंदे यांनी म्हटले आहे. ‘आपकी बार 45 पार’ हा महाराष्ट्राचा संकल्प असल्याचे मुख्यमंत्री एकनाथ शिंदे यांनी म्हटले आहे.
आज इथे जमलेली गर्दी पाहता आपण गुढीपाडवा साजरा करतोय की, काय असे वाटत असल्याचे मुख्यमंत्री एकनाथ शिंदे यांनी म्हटले आहे. अशाच प्रकारचा जल्लोष आपल्याला चार जून रोजी निवडणुकीचा निकाल लागल्यानंतर करायचा असल्याचे मुख्यमंत्री एकनाथ शिंदे यांनी म्हटले आहे. विक्रमी मतांनी विजय मुनगंटीवार हे विजयी होतील, असा विश्वास त्यांनी व्यक्त केला. सुधीर मुनगंटीवार हे विजयाची गुढी नक्कीच उभारतील असा दावा देखील मुख्यमंत्री एकनाथ शिंदे यांनी केला.
