जळगाव मिरर | २१ डिसेंबर २०२४
भुसावळकडून रावेरला येणाऱ्या होंडा सिटी कार क्रमांक एमएच २० सीएच-८००२ या कारने पिंपरूड ते सावदा दरम्यान एका निंबाच्या झाडाला धडक दिली. हि धडक इतकी भीषण होती कि कारचा अक्षरशः चुराडा झाला आहे. या भीषण अपघातात रावेर येथील शुभम सोनार, मुकेश रायपूरकर व जयेश भोई या तिघा मित्रांचा मृत्यू झाला असून विजय जाधव, गणेश भोई व अक्षय उन्हाळे हे तिघे मित्र गंभीर जखमी झाले आहेत. गुरुवारी रात्री एक वाजेच्या सुमारास ही घटना घडली.
कारमध्ये सहा जण असल्याचे समजते. या दुर्दैवी घटनेने रावेर परिसरात शोककळा पसरली आहे. अपघातात ठार झालेला मुकेश रायपूरकर याचा वाढदिवसाच्या दिवशीच अपघातात दुर्दैवी मृत्यू झाल्याची घटना घडली आहे. या अपघातात ३ जण जखमी असून त्यापैकी एकाची प्रकृती चिंताजनक आहे. दरम्यान अपघाताची माहिती मिळताच मध्यरात्रीपासून आ. अमोल जावळे यांनी मृतांच्या व जखमींच्या कुटुंबियांशी संपर्क साधून त्यांना धीर दिला आहे. या अपघातात जखमीवर उपचार सुरु असलेल्या रुग्णालयातील डॉक्टरांशी श्री जावळे यांनी संपर्क साधून जखमींची विचारपूस करीत उपचाराबाबत योग्य त्या सूचना दिल्या आहेत. या घटनेने रावेर परिसरावर शोककळा पसरली आहे. दरम्यान या प्रकरणी सावदा पो.स्टे. ला अपघाताची नोंद करण्याचे काम सुरू होते.
हा अपघात रात्री १ वाजे दरम्यान झाल्यावर सावदा येथील काही युवक भुसावळ येथे रेल्वे स्टेशनवर नातेवाईक यांना सोडून परत येत होते त्यांना हा अपघात घडल्याचे दिसताच त्यांनी लागलीच सावदा पोलीस स्टेशन मध्ये माहिती दिली व अपघातग्रस्त लोकांना मदत सुरू केली. सदर अपघातग्रस्त युवकांना बाहेर काढले व उपचारार्थ दवाखान्यात रवाना केले यात सावदा येथील संभाजी मित्र मंडळाचे मित्रांनी तात्काळ मदत केली. प्रत्यक्षदर्शी नुसार हा अपघात इतका भीषण होता की गाडी झाडावर आदळल्यावर गाडी चक्काचूर झाली गाडीचे दोन ते चार तुकडे झाले यातूनच या अपघाताची भीषणता समोर येते.
