जळगाव मिरर | ६ मार्च २०२४
देशात गेल्या काही वर्षापासून अनेक राजकीय नेत्यांना जीवे ठार मारण्याच्या धमक्या सुरु असतांना आता राज्यातील अमरावतीच्या खासदार नवनीत राणा यांना जीवे मारण्याचे धमकी देण्यात आली आहे. नवनीत राणा यांनी ही धमकी पाकिस्तान किंवा अफगाणिस्तान येथून देण्यात आल्याची धक्कादायक माहिती समोर आली आहे. त्यामुळे याप्रकरणी राजापेठ पोलिस ठाण्यात तक्रार दाखल करण्यात आली असून या प्रकरणाचे गांभीर्य पाहता पोलिसांनी तात्काळ तपास सुरू केला आहे.
आमदार रवी राणा यांनी या धमकी प्रकरणातची तक्रार गृहमंत्री देवेंद्र फडणवीस आणि पोलिस महासंचालकांकडे केली असल्याची माहिती दिली. एमआयआमचे प्रमुख खासदार असदुद्दीन ओवेसी आणि इम्तियाज जलील यांच्या सांगण्यावरूनच नवनीत राणा यांना धमकी आल्याचा दावा देखील आमदार रवी राणा यांनी केला आहे. नवनीत राणा या लोकसभेमध्ये हिंदू समाजाची बाजू मांडत असल्याने त्यांना ही धमकी आल्याचा दावा देखील आमदार रवी राणा यांनी केला.
अमरावतीच्या खासदार असलेल्या नवनीत राणा या आगामी लोकसभा निवडणुकीत भारतीय जनता पक्षाच्या चिन्हावर निवडणुकीला सामोरे जाण्याची शक्यता वर्तवली जात आहे. या दरम्यान गेल्या काही दिवसात त्यांनी हिंदुत्वाचा मुद्दा लावून धरला आहे. त्यामुळे आगामी काळात त्या हिंदुत्वाच्या मुद्द्यावरच नवनीत राणा लोकसभा निवडणुकीला सामोरे जाणार असल्याचे स्पष्ट झाले आहे. या दरम्यान आता नवनीत राणा यांना पाकिस्तान किंवा अफगाणिस्तान मधून धमकी आली आहे. याआधी देखील खासदार नवनीत राणा यांना अशा पद्धतीने व्हाट्सअप वर धमकी देण्यात आली होती. मात्र, त्यावेळी धमकी देणाऱ्याला पोलिसांनी ताब्यात घेतले होते. या दरम्यान आता नवनीत राणा यांना पाकिस्तान किंवा अफगाणिस्तान मधून धमकी आली आहे. या प्रकरणाचे गांभीर्य लक्षात घेता पोलिसांनी तात्काळ तपास सुरू केला आहे.
याप्रकरणी आमदार रवी राणा यांनी एमआयएमचे प्रमुख असदुद्दीन ओवेसी आणि खासदार इम्तियाज जलील यांच्यावर गंभीर आरोप केले आहेत. खासदार नवनीत राणा या संसदेमध्ये कायमच हिंदुत्वाचा मुद्दा मांडत आहेत. त्यामुळे त्यांना धमकी देण्यात येत असल्याचे आमदार रवी राणा यांनी म्हटले आहे. याप्रकरणी खासदार ओवेसी आणि धमकी देणाऱ्या व्यक्तींमध्ये काही लिंक आहे का? याचा तपास करण्याची मागणी देखील आमदार रवी राणा यांनी केली आहे. या संदर्भात आपण पोलिस महासंचालक आणि राज्याचे गृहमंत्री यांच्याकडे तक्रार केली असल्याची माहिती देखील आमदार रवी राणा यांनी दिली आहे.
