जळगाव मिरर | २६ जून २०२३
शेतात जात असताना पाठीमागून येणाऱ्या भरधाव कारने दुचाकीला धडक दिल्याने एका तरुणाचा मृत्यू झाला तर अन्य एकजण गंभीर जखमी झाला. ही घटना २३ रोजी सायंकाळी खडकी रस्त्यावर घडली. धडक देणारा कारचालक कार सोडून पळून गेला. याप्रकरणी चाळीसगाव शहर पोलिस स्टेशनला कारचालकाच्या विरोधात अपघाताचा गुन्हा दाखल करण्यात आला आहे.
चाळीसगाव शहरातील गजाननवाडी, शास्त्रीनगर येथील गोपाल पुंडलिक कुंभार यांचे खडकी बुक शिवारात शेत आहे. दि. २३ रोजी सायंकाळी चार वाजता गोपाल कुंभार हे पुतण्या राहुल राजू कुंभार (वय २४) याच्यासह एमएच १९ बीए ३६६५ या टचालीने चाळीसगावकडून खडकीकटे शेतात जात असताना रुद्र हनुमान मंदिराजवळ दुचाकीच्या मागून येणाऱ्या एमएच. १२ केएन ९०९५ या भरधाव कारचालकाने दुचाकीला जोरदार धडक दिली. या धडकेने गोपाल कुंभार व राहुल कुंभार हे रस्त्यावर फेकले गेले. त्यात राहुल यास डोक्यास गंभीर दुखापत झाली. अपघात होताच नागरिकांनी घटनास्थळी धाव घेतली. नागरिकांनी त्या दोघांना खासगी रुग्णालयात उपचारासाठी दाखल केले. राहुल कुंभार याच्या डोक्याला गंभीर दुखापत झाली. त्याला धुळे येथे उपचारासाठी नेत असतानाच रस्त्यातच मृत्यू झाला. याप्रकरणी गोपाल कुंभार यांच्या फिर्यादीवरून फरार कारचालकाच्या विरोधात चाळीसगाव शहर पोलिस स्टेशनला गुन्हा दाखल करण्यात आला आहे
