जळगाव मिरर | २५ जून २०२४
फैजपूर शहरातील छत्री चौकात साईड देण्याच्या कारणावरून बसचालकाला चारचाकी वाहन चालकाने अडवले आणि चालकाची कॉलर ओढून शिवीगाळ करत मारहाण केली. तसेच चालकाने बस स्थानकात आणली तेव्हाही बस स्थानकात येऊन चालकाच्या कानशिलात लगावून शासकीय कामात अडथळा निर्माण केला. तसेच शिवीगाळ करत ठार मारण्याची धमकी दिल्याची घटना सोमवारी सकाळी घडली. याप्रकरणी फैजपूर पोलीस ठाण्यात अदखलपात्र गुन्हा नोंदवण्यात आला आहे. तर चालकास उपचारार्थ यावल रुग्णालयात दाखल करण्यात आले आहे.
मिळालेल्या माहितीनुसार, फैजपूर शहरातील छत्री चौकात भुसावळ एसटी आगारातील चालक सुधाकर रूपचंद अटक (वय ४१, रा. खडका, ता. भुसावळ) हे सोमवारी सकाळी ७ वाजता एसटी बस (एमएच ४०, एन- ९८७६) घेऊन भुसावळ ते लोहारा जात होते. दरम्यान फैजपूर शहरात छत्री चौकात ते आले असता त्यांच्या पाठीमागून एक महिंद्रा कंपनीची चारचाकी कार (एमएच ०९, डीएक्स- १३१५) घेऊन चालक मोहम्मद अमीर मोहम्मद आरिफ (रा. फैजपूर) हे आले. त्यांनी एसटी बस अडवली तर चालकास बसचा दरवाजा उघडून बाहेर ओढले व शिविगाळ करून मारहाण केली. तसेच चालकाने एसटी बस फैजपूर बस स्थानकात आणली. तेथे ही त्यास कार चालकाने येवून शिवीगाळ करून कानशिलात मारून ठार मारण्याची धमकी दिली. या प्रकरणी फैजपूर पोलीस ठाण्यात अदखलपात्र गुन्हा नोंदवण्यात आला आहे. तर जखमी झालेल्या चालकावर यावल ग्रामीण रुग्णालयामध्ये वैद्यकीय अधिकारी डॉ. प्रशांत जावळे, डॉ. उमेश अडबलवाड, अधिपरिचारीका माधुरी ठोके, बापू महाजन आदींनी उपचार केले.