जळगाव मिरर | १० डिसेंबर २०२३
जळगाव शहरातील एका तरुणीशी जवळीक साधण्याच्या उद्देशाने वारंवार तिचा पाठलाग करीत तिच्याशी जबरदस्तीने अश्लील चाळे केले. तसेच माझ्याशी संबंध वाढविले नाही तर तुझ्या वडिलांना खोट्या गुन्ह्यात अडकवेल व तुझ्या भावंडांना सुद्धा मारुन टाकेल, अशी धमकी दिल्याची घटना उघडकीस आली आहे. याप्रकरणी अक्षय अजय जयस्वाल (वय २३) या तरुणाविरुद्ध विनयभंगाचा गुन्हा दाखल करण्यात आला आहे.
मिळालेल्या माहितीनुसार, जळगाव शहरातील जिल्हापेठ पोलिस ठाण्याच्या हद्दीतील एक तरुणी शिक्षण घेत आहे. जून २०२२ मध्ये अक्षय जयस्वाल या तरुणाने तिच्याशी जवळीक साधण्याच्या उद्देशाने ओळख केली. त्यानंतर तिला मेहरुण तलाव येथे घेऊन जाऊन तिच्याशी जबरदस्तीने अश्लील चाळे केले. त्यानंतर देखील तरुण हा तरुणीचा सतत पाठलाग करीत असे. तरुणीने त्याच्याशी संबंध वाढविले नाही व घरी सांगितले तर तिच्या वडिलांना खोट्या गुन्ह्यात अडकवून आणि टोळी पाठवून भावंडांना मारुन टाकेल, अशी धमकी दिली होती. या प्रकरणी तरुणीने जिल्हापेठ पोलिस ठाण्यात फिर्याद दिली. त्यावरून अक्षय जयस्वाल या तरुणाविरुद्ध विनयभंगाचा गुन्हा दाखल करण्यात आला आहे. पुढील तपास सपोनि मीरा देशमुख करत आहेत.
