जळगाव मिरर | १६ ऑक्टोबर २०२३
जळगाव शहरातील एका परिसरातील २२ वर्षीय तरुण आज कामानिमित्त एमआयडीसीतील कंपनीत कामाला गेला होता. कामाच्या पहिल्याच दिवशी इलेक्ट्रीक शॉक लागून तरूणाचा दुदैवी मृत्यू झाल्याची घटना घडली आहे तर या घटनेत दुसरा कामगार तरूण गंभीररीत्या भाजला गेल्याची घटना सोमवारी १६ ऑक्टोबर रोजी सकाळी ८ वाजेच्या सुमारास घडली आहे.याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, जळगाव शहरातील फातीमा नगर येथील रहिवासी राहूल दरबार राठोड (वय-२२) हा तरूण गेल्या २० वर्षांपासून आईवडील व लहान भाऊ यांच्यासोबत वास्तव्याला होता. सोमवारी १६ ऑक्टोबर रोजी सकाळी ८ वाजता तो एमआयडीसीतील एका प्लास्टीक कंपनीत कामाचा पहिला दिवस असल्याने कामावर हजर झाला. यावेळी कंपनीत काम करत असलेल्या मशिननचा ईलक्ट्रीक शॉक लागल्याने त्याचा जागीच मृत्यू झाला. तर सोबत असलेला जीवन गजानन चौधरी हा गंभीररित्या भाजला गेला आहे. दोघांना तातडीने खासगी वाहनातून जिल्हा शासकीय वैद्यकीय महाविद्यालयात दाखल करण्यात आले.
यावेळी वैद्यकीय अधिकारी डॉ. निरंजन देशमुख यांनी तपासणी केली असता मयत घोषीत केले. तर जखमीस खासगी रूग्णालयात हलविण्यात आले.
मयताच्या पश्चात आई कौसल, वडील दरबार भिका राठाडे, लहान भाऊ अर्जून आणि विवाहित बहिण असा परिवार आहे. याबाबत एमआयडीसी पोलीसात अकस्मात मृत्यूची नोंद करण्यात आली आहे.
