जळगाव मिरर | २९ जून २०२५
घरगुती वापरासह कमर्शियल वापराच्या गॅस सिलींडरचा बेकायदेशीररित्या घरात साठा करुन ठेवणाऱ्या वसीम चंगा शाह (वय २८, रा. वीर सावकरनगर, पिंप्राळा वखारीजवळ, जळगाव) याच्या रामानंद नगर पोलिसांनी छापा टाकत पर्दाफाश केला. ही कारवाई दि. २७ रोजी सायंकाळच्या सुमारास केली. त्याच्याघरातून ५९ हजार रुपये किंमतीचे १९ गॅस सिलींडर जप्त करण्यात आले असून त्याच्याविरुद्ध गुन्हा दाखल करण्यात आला आहे.
सविस्तर वृत्त असे कि, शहरातील पिंप्राळा परिसरातील वखारीजवळ एका व्यक्तीच्या घरात गॅस सिलींडरचा बेकायदेशीरित्या साठा विक्री करण्याच्या उद्देशाने केल्याची माहिती रामानंद नगर पोलीस ठाण्याचे पोलीस निरीक्षक राजेंद्र गुंजाळ यांना मिळाली त्यानुसार त्यांनी लागलीच गुन्हे शोध पथकातील उपनिरीक्षक सचिन रणशेवरे, पोहेकॉ जितेंद्र राजपूत, जितेंद्र राठोड, विनोद सुर्यवंशी, अजय सपकाळे यांचे पथक तयार करुन कारवाई करण्याच्या सूचना दिल्या. त्यानुसार पथक कारवाईसाठी रवाना झाले. या पथकाने पिंप्राळा परिसरातील वखारीजवळील वीर सावरकर नगरातील एका घरात छापा टाकला. याठिकाणी घरगुती वापराचे व कमर्शियल गॅस सिलींडर ठेवलेले होते. तसेच तेथे वजन काटा देखील मिळून आला. तसेच वसीम चंगा शहा याला देखील ताब्यात घेतले.
संशयिताने गॅस सिलींडर कुठून घेतल्या याबाबत विचाराणा केली. मात्र त्याने कुठलीही माहिती पोलिसांना दिली नाही. त्यामुळे पोलिसांना वसीम शाह याने जीवनावश्यक वस्तू कमर्शियल व घरगुती गॅस सिलीडरचा बेकायदेशीररित्या साठा करुन त्याची विक्री करण्याच्या उद्देशाने ठेवल्याचे निष्पन्न झाले. याप्रकरणी विनोद सुर्यवंशी यांनी दिलेल्या तक्रारीवरुन गुन्हा दाखल करण्यात आला आहे.
पोलिसांनी छाप्यात शाह याच्या घरातून २ हजार ८०० रुपयांचे भारत गॅस कंपनीचे १, ३० हजारांचे ८ भरलेले कमर्शियल, २२ हजार ५०० रुपयांचे १० रिकामे कमर्शियल असे एकूण १९ गॅस सिलींडर व ४ हजारांचे दोन वजनकाटे व एक रेग्युलेटर असा एकूण ५९ हजार ४०० रुपयांचा ऐवज जप्त केला.
