जळगाव मिरर | ५ जानेवारी २०२५
अमळनेर तालुक्यातील एका गावात झालेल्या वादानंतर पोलिसांत केलेली तक्रार मागे घेतली नाही म्हणून अल्पवयीन मुलीवर अत्याचाराचा प्रयत्न केल्याची घटना ३ रोजी घडली आहे.
याबाबत पीडित मुलीच्या आईने मारवड पोलीस ठाण्यात फिर्याद दाखल केली आहे. त्यानुसार ३ रोजी सकाळी ९ वाजता फिर्यादी महिला गच्चीवर कपडे टाकायला गेली होती. त्या वेळी तिची ११ वर्षीय अल्पवयीन मुलगी आपल्या लहान भावाला झोपाळ्यात झोपवून झोका देत होती. त्याच वेळी मुलीचा अचानक ओरडण्याचा आवाज आल्याने फिर्यादी महिला घरात आली.
त्या वेळी गावातीलच भाऊसाहेब उर्फ प्रशांत अशोक बोरसे हा झोक्याजवळ उभा असल्याचे दिसून आले. त्याला पकडण्याचा प्रयत्न केला, मात्र तो पळून गेला. त्यानंतर महिलेने आपल्या मुलीला हकीकत विचारली असता भाऊसाहेबने घरात येऊन अश्लील कृत्य करण्याचे सांगितले. तसेच ते न केल्यास तुझ्या भावाला मारून टाकेल, अशी धमकी दिल्याने आरडाओरड केल्याचे मुलीने सांगितले. त्यानंतर फिर्यादी महिला संशयित आरोपीच्या घरी गेली असता भाऊसाहेबची आई उषाबाई अशोक बोरसे हिने काहिही ऐकून न घेता शिवीगाळ केली. तसेच तुम्ही आमच्याविरूद्ध केलेल्या तक्रारीत ३५ जणांची नावे टाकली आहेत, ती कमी न केल्यास आम्ही असेच करत राहू, अशी धमकी फिर्यादी महिलेला दिली. दरम्यान, या महिलेचे पती घरी नसल्याने तिने ४ रोजी मारवड पोलिसांत फिर्याद दाखल केली आहे. या प्रकरणी पोक्सोसह अन्य कलमान्वये गुन्ह्याची नोंद करण्यात आली आहे. या घटनेचा तपास पीएसआय राहुल बोरकर करत आहेत.
