कोण आहे हा तरुण जो शरद पवारांसोबत विमानातून करतोय प्रवास

मुंबई : राष्ट्रवादी काँग्रेसचे अध्यक्ष शरद पवार यांचा एक फोटो सोशल मीडियावर व्हायरल होत आहे. शरद पवार गेल्या दोन दिवसांपासून औरंगाबादच्या दौऱ्यावर आहेत. शरद पवार यांचा बारामतीहून औरंगाबादला जातानाचा तो फोटो आहे. शरद पवार यांच्यासोबत त्या फोटोमध्ये औरंगाबादमधील संशोधक भारत चव्हाण आहेत. औरंगाबादमधील भारत चव्हाण त्यांच्या संशोधनासंदर्भात शरद पवार यांच्याशी चर्चा करण्यासाठी बारामतीला आले होते. भारत चव्हाण यांनी देखील विमान प्रवासाबद्दल ट्विट करुन भावना व्यक्त केल्या आहेत.

राष्ट्रवादी काँग्रेसचे अध्यक्ष शरद पवार यांनी भारत चव्हाण यांना विमानानं औरंगाबादला सोबत येण्यास सांगितलं. विमान प्रवासादरम्यान पवार यांनी भारत चव्हाण यांच्या कुटुंबाची, गावाची विचारपूस केली. भारत चव्हाण यांनी उसाच्या बगॅसवर अळिंबीची (मशरुम) लागवड या विषयावर संशोधन केलं आहे. या संशोधनाबद्दल त्यांनी शरद पवार यांच्याशी चर्चा केली.

आज आषाढी एकादशी आणि माझा नशीब माझ्यासारख्या प्रश्न मांडायला आलेल्या सामान्य तरुणाला स्वतःच्या सोबत बारामती ते औरंगाबाद विमाणाने प्रवास घडवून आणला तो याच माणसातल्या विठ्ठलाने

खूप धन्यवाद @PawarSpeaks pic.twitter.com/sQpuywR0EQ

— Dr Bharat V. Chavan (@indiacspeaks) July 10, 2022

राष्ट्रवादी काँग्रेसचे अध्यक्ष शरद पवार १० जुलैपासून मराठवाड्यातील विविध कार्यक्रमानिमित्त औरंगाबादमध्ये आहेत. औरंगाबादहून शरद पवार यांना त्याच दिवशी भेटण्यासाठी भारत चव्हाण आले होते. भारत चव्हाण यांनी वनस्पतीशास्त्रात संशोधन केलं आहे. पीएचडी प्रबंध शरद पवार यांना दाखवण्यासाठी ते आले होते. पवार यांनी भेटीनंतर औरंगाबादलाच जाणार असल्यानं सोबत येणार का असं विचारलं? भारत चव्हाण यांनी त्यांना विमानानं प्रवास करण्याची तयारी दर्शवली. भारत चव्हाण यांनी शरद पवार यांच्यासोबतच्या विमान प्रवासेच फोटो ट्विट केले आहेत.

भारत चव्हाण यांनी उसाच्या बगॅसवर अळिंबीची लागवड हा प्रबंध शरद पवार यांना अर्पण केला आहे. भारत चव्हाण यांनी शरद पवार यांच्यासोबत केलेल्या प्रवासाविषयी भावना व्यक्त केल्या आहेत. माझ्यासारख्या प्रश्न मांडायला आलेल्या सामान्य तरुणाला स्वतःच्या सोबत बारामती ते औरंगाबाद विमानाने प्रवास घडवून आणला तो याच माणसातल्या विठ्ठलाने, अशा भावना भारत चव्हाण यांनी व्यक्त केल्या आहेत. राष्ट्रवादी काँग्रेसचे अध्यक्ष शरद पवार यांच्या औरंगाबाद प्रवासातील फोटोंना सोशल मीडियावर पसंती मिळत आहे.