जळगाव मिरर । ५ नोव्हेबर २०२२
राज्यात मुख्यमंत्री शिंदे यांनी रुग्णालयात जात राष्ट्रवादीचे अध्यक्ष शरद पवार यांची भेट घेतल्यानंतर राजकीय मंडळीकडून वेगवेगळे अंदाज वर्तविले जात आहेत. तर आज शिर्डी येथील राष्ट्रवादीच्या शिबिरास अंगात थोडासा ताप, हाताला लावलेल्या पट्ट्या अन् कातर झालेला आवाज… अशा परिस्थितीत ज्येष्ठ नेते शरद पवार यांनी उपस्थिती लावली. खुर्चीवरुन त्यांनी आपलं छोटेखानी मनोगत व्यक्त केलं आणि आपल्या भाषणाचा कागद त्यांनी माजी गृहमंत्री दिलीप वळसे पाटलांच्या हाती सोपवून आपलंच भाषण वळसे पाटलांच्या तोंडून ऐकत राहिले. पवारांनी आजारपणातही राष्ट्रवादीच्या शिबिराला लावलेली उपस्थिती आणि केलेलं छोटेखानी भाषण यामुळे शिबिराला उपस्थित राष्ट्रवादीचा प्रत्येक कार्यकर्ता अचंबित झाला. पवारांनी बोलायला माईक हाती घेताच शिबिरस्थळी टाळ्यांच्या कडकडाटाने पवारांना मानवंदना देण्यात आली.
राष्ट्रवादी काँग्रेस पक्षाचे अध्यक्ष शरद पवार यांनी ‘राष्ट्रवादी मंथन, वेध भविष्याचा’ शिबिरासाठी सभागृहात प्रवेश करताच ‘देश नेता कैसा हो.. शरद पवार साहेब जैसा हो..’ या घोषणांनी संपूर्ण वातावरण भारावून गेले. गेल्या चार दिवसांपासून पवार यांना न्यूमोनियाचा संसर्ग जडल्याने ते मुंबईतील ब्रीच कँडी रुग्णालयात उपचार घेतायेत. पण राष्ट्रवादीचं नियोजित शिबिर असल्याने पवारांना जायला जमेल की नाही, याबाबत साशंकता होती. डॉक्टरांनी आरामाचा सल्ला दिला होता, पण पवार शिर्डीला जाण्यावर ठाम होते. आज सकाळीच ते हेलिकॉप्टरने शिर्डीला रवाना झाले. यावेळी कार्यकर्त्यांनी एकच जल्लोष केला. पण त्याचवेळी त्यांच्या मनात पवारांबद्दल प्रचंड आस्था होती. वयाच्या ८४ व्या वर्षी पवारांमधली उर्जा पाहून राष्ट्रवादीचे नेते कार्यकर्ते भारावून गेले.
तब्येत बरी नसतानाही पवारसाहेब आपण ‘राष्ट्रवादी मंथन शिबिरा’ला उपस्थित राहून आम्हा कार्यकर्त्यांना मार्गदर्शन केलंत.. आज तुमच्या हाताला इंजेक्शनची पट्टी होती.. अशाही स्थितीत लढणारा तुमच्यातील योद्धा उद्या लोकशाहीवरील संकटाला परतवून लावल्याशिवाय राहणार नाही,असा विश्वास आहे, असं ट्विट राष्ट्रवादीचे आमदार रोहित पवार यांनी केलं.
