जळगाव मिरर । १५ नोव्हेबर २०२२
राज्यात शिंदे व ठाकरे गट एकमेकाचे चांगलेच विरोधक होत असल्याच्या काही घटनामधून समोर येत आहे. ठाण्यातील राजकीय संघर्ष आता हिंसक होताना दिसत आहे. काल सोमवारी ठाण्यातील किसननगर येथे उद्धव ठाकरे गटाच्या मेळाव्यात एकनाथ शिंदे यांच्या कार्यकर्त्यांनी घुसखोरी करत ठाकरेंच्या कार्यकर्त्यांना मारहाण केली. घटनास्थळी ठाकरे गटाचे खासदार राजन विचारेही उपस्थित होते. यावेळी त्यांनाही धक्काबुक्की झाल्याचे दिसत आहे. पोलिसांनी धाव घेत त्यांना घटनास्थळावरून बाहेर काढले. ही मारहाण कॅमेऱ्यांतही कैद झाली आहे.
काल मध्यरात्री ही घटना घडली. शिंदे गटाचे कार्यकर्ते योगेश जानकर व इतरांनी ठाकरे गटाच्या कार्यकर्त्यांना मारहाण केल्याचे सांगितले जात आहे. घटना घडली त्या किसन नगर परिसरात मुख्यमंत्री शिंदे यांचे प्राबल्य आहे. शिवसेना उद्धव बाळासाहेब ठाकरे या पक्षाचे उपजिल्हाप्रमुख संजय घाडीगांवकर यांनी आयोजित केलेल्या कार्यक्रमादरम्यान शिंदे गटाच्या कार्यकर्त्यांनी घोषणाबाजी करत ठाकरे गटाच्या एका कार्यकर्त्याला बेदम मारहाण केली. मारहाणीत कार्यकर्ता जखमी झाल्याने त्याला रुग्णालयात दाखल करण्यात आले आहे. या घटनेनंतर दोन्ही गट येथीळ श्रीनगर पोलिस स्टेशनसमोरही आमने-सामने आले.
