जळगाव मिरर / ११ एप्रिल २०२३
राज्यात गेल्या काही दिवसापासून अवकाळी पावसाने शेतकऱ्यांना चांगलेच झोडपले असताना आता पुन्हा राज्यातील काही भागात हा पाऊस सुरु झाला आहे. राज्याचे मुख्यमंत्री अवकाळी पाऊस झाल्यामुळे पाहणी करीत असताना मराठवाडा, विदर्भात वादळी वाऱ्यासह मोठ्या प्रमाणावर गारपीट झाली. दरम्यान आज पुण्यात अवकाळी पाऊस सुरु झाला आहे. पुण्यात काही ठीकाणी गारा देखील पडत आहेत. पुण्यातील कोथरुड परिसरात गारा पडल्या. तसेच विजांचा कडकडाटासह जोराचा वारा सुरू आहे.
पुढील पाच दिवस महाराष्ट्रात पुन्हा एकदा अवकाळी पावसाचा अंदाज वर्तवण्यात आला आहे. आजपासून (११ एप्रिल, मंगळवार) सुरू होणारा हा अवकाळी पाऊस पुढील पाच दिवस मध्य महाराष्ट्र आणि मराठवाड्यासह अनेक भागात पडणार आहे. गेल्या पाच-सहा दिवसांपासून राज्यातील अनेक भागात अवकाळी महाराष्ट्रात शेतकऱ्यांच्या पिकांचे मोठे नुकसान झाले आहे. अशा स्थितीत पुणे हवामान खात्याने (आयएमडी) आजपासून पुढील पाच दिवस अवकाळी पावसाचा अंदाज वर्तवत पुन्हा एकदा तणाव वाढवला आहे.
या भागात १३ आणि १५ एप्रिल रोजी मध्य महाराष्ट्र आणि मराठवाड्यातील अनेक भागात गारपीट होण्याची शक्यता आहे. विदर्भातही काही ठिकाणी हलक्या पावसाची शक्यता वर्तवण्यात आली आहे. गाराही पडण्याची शक्यता.
