जळगाव मिरर | २५ सप्टेंबर २०२३
भाजप व शरद पवारांची राष्ट्रवादी या दोन्ही पक्षात नेहमीच आरोप प्रत्यारोपाच्या फैरी झडत असतांना आज देखील पुन्हा एकदा राष्ट्रवादीच्या महिला नेत्या खा.सुप्रिया सुळे यांनी थेट भाजपचे नेते उपमुख्यमंत्री देवेद्र फडणवीस यांच्यावर हल्लाबोल केला आहे.
खा.सुळे म्हणाले कि, उपमुख्यमंत्री देवेंद्र फडणवीस यांना दुसऱ्यांची घरे व पक्ष फोडण्यासाठी वेळ आहे, पण विकासासाठी नाही, अशी तिखट टीका त्यांनी यावेळी केली. नागपुरात पावसाने नुकताच हाहाकार माजला होता. या मुद्यावरून स्थानिकांनी उपमुख्यमंत्री देवेंद्र फडणवीस यांनी कथितपणे स्थानिकांवर अरेरावी केल्याचा एक व्हिडिओ व्हायरल झाला आहे. या पार्श्वभूमीवर सुप्रिया सुळे यांनी त्यांच्यावर निशाणा साधला आहे. त्या म्हणाल्या की, जालन्यात महाराष्ट्रातील सुना, लेकी व मुलांवर हल्ला झाला तेव्हा देवेंद्र प्रचाराला गेले होते. नागपूरमध्ये त्यांची गाडी अडवणे योग्य नाही. ते महाराष्ट्राचे उपमुख्यमंत्री आहेत. पण त्यांनी त्यांचा वेळ दुसऱ्यांची घरे व पक्ष फोडण्यात खर्च न करता विकासावर केला असता तर ही वेळ आली नसती, असे सुप्रिया सुळे म्हणाल्या.
देवेंद्र फडणवीस यांची गाडी अडवण्याच्या कृतीचे मी समर्थन करणार नाही. ते माझे राजकीय विरोधक आहेत. आपण सर्वांनी एकत्र येवून नागपूरची स्थिती सुधारण्यास मदत करण्याची गरज आहे. असे असले तरी भाजपचे नेतृत्व सीबीआय व ईडीच्या मदतीने घर व पक्ष फोडण्यात एवढे व्यस्त असतात की त्यांना बदल किंवा विकास करण्यासाठी वेळच नसतो हे त्यांच्या कृतीतून दिसते, असेही सुप्रिया सुळे यावेळी म्हणाल्या.