जळगाव मिरर | १० डिसेंबर २०२३
गेल्या काही महिन्यापासून सोन्यासह चांदीच्या दरात कमी अधिक होत असतांना नुकतेच पाच दिवसांपूर्वी ऐतिहासिक उच्चांकीवर पोहोचलेल्या सोन्याच्या भावात दि. ९ डिसेंबर शनिवार रोजी ६५० रुपयांची घसरण होऊन ते ६२ हजार ३०० रुपये प्रतितोळ्यावर आले आहे. चांदीमध्येदेखील ५०० रुपयांची घसरण होऊन ती ७४ हजार रुपये प्रतितोळ्यावर आली आहे. पाच दिवसांमध्ये सोने दोन हजार आणि चांदी चार हजार रुपयांनी घसरली आहे. विशेष म्हणजे अमेरिकन डॉलरचे दर वाढत असताना सोने-चांदीचे भाव कमी झाले आहे. शेअर बाजार उसळी घेत असल्याने हे भाव कमी होत असल्याचा अंदाज सराफ व्यावसायिकांनी वर्तविला आहे.
४ डिसेंबर रोजी सोन्याने उच्चांकी गाठत ते ६४ हजार ३०० रुपये प्रतितोळ्यावर पोहोचले. ५ डिसेंबर रोजी एक हजार ३०० रुपयांची घसरण झाल्याने सोने ६३ हजार रुपये प्रतितोळ्यावर आले. ६ रोजी २५० रुपयांनी घसरण झाली. मात्र, ७ रोजी ५० रुपये आणि ८ रोजी १५० रुपयांची वाढ होऊन सोने ६२ हजार ९५० रुपयांवर पोहचले. मात्र, ९ रोजी ६५० रुपयांची घसरण झाली व सोने ६२ हजार ३०० रुपये प्रतितोळ्यावर आले. पाच दिवसांत सोन्यात दोन हजार रुपयांची घसरण झाली आहे. अशाच प्रकारे चांदीच्या भावातही चढ-उतार होऊन चांदीत पाच दिवसांत चार हजार रुपयांची घसरण झाली आहे.
