जळगाव मिरर | २१ जुलै २०२४
चोपडा तालुक्यातील घुमावल बुद्रुक येथील माजी सरपंच तथा भाजपचे माजी पदाधिकारी प्रकाश उर्फ पप्पू लक्ष्मण पाटील (वय ४४) यांनी घुमावल खुर्द शिवारातील शेतात लिंबाच्या झाडाला दोरीच्या साह्याने गळफास घेत आपली जीवनयात्रा संपवल्याची घटना २० रोजी सकाळी ८ वाजेच्या सुमारास उघडकीस आली. या दुर्दैवी घटनेमुळे परिसरात हळहळ व्यक्त होत आहे.
सविस्तर वृत्त असे कि, भाजपचे प्रकाश पाटील हे घुमावल बुद्रुक येथील घरून २० रोजी सकाळी ७ वाजेच्या सुमारास बाहेर पडले. परंतु. कामानिमित्त त्यांचे मोठे बंधू रविकांत लक्ष्मण पाटील हे घुमावल खुर्द शिवारातील शेतात आले. या वेळी त्यांना प्रकाश पाटील यांचा मृतदेह शेतातील लिंबाच्या झाडाला लटकलेल्या स्थितीत दिसून आला. त्यानंतर नातेवाईकांनी प्रकाश पाटील यांना चोपडा उपजिल्हा रुग्णालयात दाखल केले. तेथे डॉ. सुरेश पाटील यांनी तपासणी करुन त्यांना मृत घोषित केले. या प्रकरणी डॉ. सुरेश पाटील यांच्या खबरीवरून चोपडा शहर पोलीस ठाण्यात अकस्मात मृत्यूची नोंद करण्यात आली आहे. प्रकाश पाटील यांनी आत्महत्येसारखे टोकाचे पाऊल का उचलले, हे मात्र कळू शकले नाही. त्यांच्या आत्महत्येची वार्ता कळताच तालुक्यातील सर्वपक्षीय पदाधिकारी, कार्यकर्त्यांनी चोपडा उपजिल्हा रुग्णालयात धाव घेतली होती. त्यांच्या पश्चात पत्नी, २ मुले, भाऊ असा परिवार आहे. मनमिळाऊ स्वभावाचे असलेले प्रकाश पाटील यांच्या जाण्याणे परिसरात शोककळा पसरली आहे. त्यांच्यावर घुमावल बुद्रुक येथे शोकाकूल वातावरणात अंत्यसंस्कार करण्यात आले.
