नवी दिल्ली : वृत्तसंस्था
महाराष्ट्रातील शिंदे-फडणवीस सरकारच्या मंत्रीमंडळाचा विस्तार आणि खातेवाटपाची चर्चा करण्यासाठी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस शुक्रवारी दिल्लीत दाखल झाले. दोन दिवसांच्या सदिच्छा भेटीत मुख्यमंत्री शिंदे हे पंतप्रधान नरेंद्र मोदी, केंद्रीय गृहमंत्री अमित शहा आणि भाजपचे राष्ट्रीय अध्यक्ष जे. पी. नड्डा यांची भेट घेणार आहेत.
राज्यात सरकार स्थापन केल्यानंतर प्रथमच मुख्यमंत्री शिंदे आणि उपमुख्यमंत्री फडणवीस दिल्लीत आले आहेत. विमानतळावरून महाराष्ट्र सदन येथे पोहोचल्यानंतर शिंदे आणि फडणवीस यांनी स्वतंत्रपणे अमित शहा यांचे निवासस्थान गाठले. या बैठकीत खातेवाटपाविषयी चर्चा झाल्याचे समजते. दरम्यान, विधानसभेचे नवनिर्वाचित अध्यक्ष राहुल नार्वेकर यांनीही शुक्रवारी दिल्लीत अमित शहा, जे. पी. नड्डा, संरक्षणमंत्री राजनाथ सिंह यांची सदिच्छा भेट घेतली.
मंत्रीमंडळाच्या एकूण ४३ मंत्र्यांपैकी शिंदे गटाने ८ कॅबिनेट आणि पाच राज्यमंत्रिपदांची मागणी केल्याची माहिती असून उर्वरीत २९ मंत्रिपदे भाजपने घ्यावीत, असा प्रस्ताव आहे. शिंदे हे उद्या पंतप्रधानांची भेट घेणार आहेत. नड्डा तसेच, मावळते राष्ट्रपती रामनाथ कोविंद आणि उपराष्ट्रपती वेंकय्या नायडू यांचीही ते भेट घेणार आहेत. त्यानंतर सायंकाळी ते खास विमानाने पुण्याला परतणार आहेत. पंतप्रधान मोदी, अमित शहा आणि नड्डा यांची सदिच्छा भेट घेण्यासाठी दोन दिवसांच्या दौऱ्यावर आलो आहे, असे शिंदे यांनी सांगितले. या भेटीत मंत्रीमंडळाचे स्वरूप ठरून खातेवाटपाविषयी चर्चा होणार काय, असे विचारले असता ते तुम्हाला कळेलच, असे ते म्हणाले. खरी शिवसेना कोणती या प्रश्नावर बोलताना विधानसभा अध्यक्षांनी आम्हाला शिवसेना विधिमंडळ पक्ष म्हणून मान्यता दिली आहे, याकडे त्यांनी लक्ष वेधले. शिवसेनेच्या दोन तृतीयांश बहुमतासह जास्त आमदारांसह आम्ही नियमानुसार कारवाई केली आमदारांच्या अपात्रतेविषयी सर्वोच्च न्यायालय योग्य निकाल देईल, असा आम्हाला विश्वास आहे. महाराष्ट्राच्या विकासासाठी आणि शेतकऱ्यांसाठी आम्ही भरीव काम करू. आता तर सुरुवात झाली आहे, असेही ते म्हणाले. शिवसेनेचे अमरावतीचे माजी खासदार आनंद अडसूळ हेही मुख्यमंत्री शिंदे यांची भेट घेण्यासाठी महाराष्ट्र सदन येथे पोहोचले होते.
