जळगाव मिरर | २४ मे २०२६
स्वतःच्या आर्थिक फायद्यासाठी महिलांकडून वेश्या व्यवसाय करून घेत असल्याचा प्रकार उघडकीस आल्यानंतर तालुका पोलिसांनी धडक कारवाई करत दोन जणांविरुद्ध गुन्हा दाखल केला आहे. या कारवाईत दोन पीडित महिलांची सुटका करण्यात आली असून संबंधित संशयितांना पोलिसांनी ताब्यात घेतले आहे. याप्रकरणी सागर गुलाब सोनवणे (वय २७, रा. चोरगाव, ता. धरणगाव) आणि एका महिलेविरुद्ध गुन्हा दाखल करण्यात आला आहे.
मिळालेल्या माहितीनुसार, शहरातील निमखेडी रस्त्यावरील ब्रह्मांडनायक अपार्टमेंटमधील एका फ्लॅटमध्ये कुंटणखाना सुरू असल्याची माहिती तालुका पोलिसांना मिळाली होती. त्यानुसार पोलिसांनी नियोजनबद्ध पद्धतीने छापा टाकला. कारवाईदरम्यान संबंधित फ्लॅटमधून दोन पीडित महिलांची सुटका करण्यात आली. तपासादरम्यान संशयित सागर सोनवणे व एक महिला ही स्वतःच्या आर्थिक फायद्यासाठी महिलांकडून वेश्याव्यवसाय करून घेत असल्याचे समोर आले. त्यानंतर पोलिसांनी दोघांनाही ताब्यात घेत त्यांच्याविरुद्ध संबंधित कायद्यान्वये गुन्हा दाखल केला आहे. या कारवाईमुळे परिसरात खळबळ उडाली असून पुढील तपास तालुका पोलीस करीत आहेत.
