जळगाव मिरर | ३० जुलै २०२६
चोपडा शहरातील मल्हारपुरा भागातील घरात खेळताना फ्रीजला स्पर्श झाल्यानंतर विजेचा जबर धक्का बसल्याने ७वर्षीय बालकाचा जागीच मृत्यू झाल्याची दुर्दैवी घटना २९ रोजी दुपारी अडीच वाजेच्या सुमारास घडली. या दुर्दैवी घटनेमुळे संपूर्ण परिसरात शोककळा पसरली आहे. मयत चिमुकल्याचे नाव पार्थ ब्रम्हकुमार पाटील असे आहे.
दरम्यान, २९ रोजी दुपारच्या सुमारास मल्हारपुरा भागातील रहिवासी असलेल्या व पहिली वर्गातील ७ वर्षीय पार्थ ब्रम्हकुमार पाटील हा विद्यार्थी घरात खेळत होता. त्याचा अचानक फ्रीजला स्पर्श झाल्याने त्यास विजेचा जबर धक्का बसला. या वेळी त्याच्या आजीने त्याला ओढण्याचा प्रयत्न केला असता आजीलाही विजेचा धक्का बसला अन् त्या दूर फेकल्या गेल्यात. या घटनेनंतर पार्थ पाटील यास खासगी रुग्णालयात उपचारासाठी नेण्यात आले.
मात्र, डॉक्टरांनी तपासून त्यास मयत घोषित केले. तर या दुर्दैवी घटनेत बालकाचा करुन अंत झाल्याने परिसरात हळहळ व्यक्त होत आहे. मयत पार्थला वडील नसल्याने आई त्यांचा सांभाळ करत होती. पार्थला एक भाऊ व एक बहिण आहे. पार्थच्या दुर्दैवी जाण्याने त्याच्या आईने मोठा आक्रोश केला. या वेळी त्यांचा आक्रोश पाहून उपस्थितांचेही डोळे पाणावले होते.
